ბელარუსში დაკავებულმა ოპოზიციის ლიდერმა, მარია კოლესნიკოვამ ალექსანდრ ლუკაშენკოს შეხვედრაზე უარი უთხრა. ინფორმაციას ამის შესახებ ადგილობრივი მედია ადვოკატზე დაყრდნობით ავრცელებს.

ადვოკატის თქმით, კოლესნიკოვასთან ამ შეთავაზებით უცხო პირები მივიდნენ, რომლებსაც ოპოზიციონერმა განუცხადა, რომ ლაპარაკს ლუკაშენკოს თვენახევრის წინ სთავაზობდნენ და ახლა ამ იდეის ავტორების უმეტესობა ციხეშია, ან ქვეყნიდანაა გაძევებული. მანვე ხაზი გაუსვა, რომ უცხო პირებთან საუბარს აღარ აპირებდა, რადგან ასეთებმა ერთხელ გაიტაცეს და ნახევარი ბელარუსი მოატარეს ისე, რომ არ იცოდა სად იმყოფებოდა. მისივე თქმით, თავს იზოლატორში უფრო მშვიდად გრძნობს.

ალექსანდრე ლუკაშენკო იზოლატორში მის მიერვე დაკავებულ ოპოზიციონერებს შეხვდა. ადგილობრივი მედიის ცნობით, ლუკაშენკომ 10 ოქტომბერს, იზოლატორში ოთხსაათნახევარი დაჰყო.

"კონსტიტუციას ქუჩაში ვერ დაწერ "— ასე მიმართა მან საკოორდინაციო საბჭოსა და გაერთიანებული შტაბის წევრებს. საუბრის შინაარსი შეხვედრის მონაწილეებმა ერთობლივი შეთანხმების თანახმად, არ გაახმოვანეს.

ფოტოს მიხედვით, შეხვედრას ესწრებიან: ვიქტორ ბაბარიკო, საკოორდინაციო საბჭოს წევრი — ლილია ვლასოვა, ბიზნესმენი — იური ვოსკრესენსკი, პოლიტტექნოლოგი — ვიტალი შკლიაროვი, კირილ ბადეი, დმიტრი რაბცევიჩი, ედუარდ ბაბარიკო, იურისტები — მაქსიმ ზნაკი და ილია სალეი.

საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.