ამერიკის შეერთებული შტატების პრეზიდენტი, დონალდ ტრამპი საარჩევნო კამპანიას დაუბრუნდა, მიუხედავად იმისა, რომ კორონავირუსის ტესტზე დადებითი პასუხის შემდეგ ორ კვირაზე ნაკლები გავიდა.

ტრამპი ამომრჩეველს ფლორიდაში შეხვდა და მას მომავალი 4 დღის განავლობაში კიდევ აქვს დაგეგმილი მსგავსი ღონისძიებები.

ამერიკის პრეზიდენტს კორონავირუსი 11 დღის წინ დაუდასტურდა და ის მეორე დღეს ვოლტერ რიდის სამედიცინო ცენტრში მოათავსეს.

კვირას ტრამპის პირადმა ექიმმა განაცხადა, რომ ის აღარ წარმოადგენს სხვებისთვის ინფიცირების წყაროს.

2 ოქტომბერს ტრამპის გარდა პირველ ლედისაც დაუდასტურდა კორონავირუსი. მანამდე ტესტზე დადებითი პასუხი ჰქონდა დონალდ ტრამპის მრჩეველს, 31 წლის ჰოუპ ჰიკს. იგი ოჰაიოში 29 სექტემბერს საპრეზიდენტო დებატებზე პრეზიდენტთან ერთად გაემგზავრა. მრჩევლის ინფიცირების შემდეგ პრეზიდენტი და პირველი ლედი კარანტინში გადავიდნენ და ტესტის პასუხებს ელოდნენ.

COVID-19-ის პანდემიის დაწყების შემდეგ დემოკრატიული პარტიის წარმომადგენლები ტრამპს ხშირად ადანაშაულებენ იმის გამო, რომ მან შესაბამისი ზომები არ მიიღო, რასაც არაერთი სიცოცხლე შეეწირა. ამასთან, პრეზიდენტს აკრიტიკებდნენ იმის გამოც, რომ არ იცავდა სოციალურ დისტანციას და არ ატარებდა პირბადეს.

ტესტის დადებით პასუხამდე ერთი დღით ადრე დონალდ ტრამპმა მინესოტაში მიტინგი გამართა და ამომრჩეველს შეხვდა. როგორც სხვა ღონისძიებებზე, აქაც მას პირბადე არ ეკეთა