საქართველოს ყოფილი პრეზიდენტის, მიხეილ სააკაშვილის თქმით, არ ეძიება თანამდებობას ან კაბინეტს, მაგრამ ეძებს რეზულტატს. ამის შესახებ მან TV პირველის ეთერში ისაუბრა.

სააკაშვილის ეს გამოხმაურება ევროპული საქართველოს ერთ-ერთი ლიდერის, გიგი უგულავას ვიდეოს მოჰყვა, სადაც ის ამბობს, რომ ხალხმა სააკაშვილი პრემიერმინისტრად არ უნდა აირჩიოს. სააკაშვილი გაერთიანებული ოპოზიციის პრემიერობის კანდიდატია.

"თქვენ ესაუბრებით ადამიანს, რომელიც ყველაზე მეტად კომპეტენტურია საქართველოს კრიზისიდან გამოყვანაში. ამას თუ ვინმე არ აღიარებს, ის, უბრალოდ, იდიოტია, ან, უბრალოდ, სხვა მოტივები ამოძრავებს", — განაცხადა სააკაშვილმა.

მიუხედავად იმისა, რომ აღნიშნა, არანაირ თანამდებობას არ ეძებს, მაინც შეახსენა ჟურნალისტს, რომ ელაპარაკებოდა ადამიანს, რომელსაც უკრაინის პრეზიდენტმა სამჯერ შესთავაზა უკრაინის პრემიერმინისტრობა.

"ჩემ თავზე ვლაპარაკობთ, უბრალოდ, რომ ცოტა შემოვიტკაცუნოთ ლოყებზე და ვთქვათ, ვიღაც იმაზე კი არ ვლაპარაკობთ, ჭე კლასის ლიგის წარმომადგენელზე. გადახედეთ გაზეთებს, ყველა გაზეთში ერთ-ერთი მთავარი თემაა ჩემი საბერძნეთში ჩასვლა. სადაც არ უნდა გამოვჩნდე, გვინდა თუ არ გვინდა, ვიღაცა შურით სკდება თუ ბოღმით თავის პატარა ინსტიქტების გამო, [საქართველო] მიკავშირდება მე", — აღნიშნა სააკაშვილმა.

სააკაშვილის თქმით, ძალიან ამბიციური ადამიანია, მაგრამ მისი ამბიცია მთლიანად საქართველოსა და მის განვითარებას უკავშირდება.