საზოგადობრივი მაუწყებლის გენერალური დირექტორობის კანდიდატი, ვასილ მაღლაფერიძე ამბობს, რომ ტელეკომპანია GDS-მა „პოლიტიკური მიმართულება ჩამოიცილა“. ამის შესახებ მან სამეურვეო საბჭოსთან გასაუბრებაზე განაცხადა.

ამ საკითხზე მაღლაფერიძემ სამეურვეო საბჭოს წევრის, ნათელა სახოკიას კითხვაზე პასუხისას ისაუბრა.

„GDS-ი არის ძალიან სპეციფიკური, მას ეკავა ძალიან პატარა სეგმენტი და ძალიან კონკრეტული მიზნებიდან გამომდინარე, GDS-ზე გაკეთდა მხოლოდ ერთი საინფორმაციო გადაცემა და პრინციპული მოთხოვნა და ხედვა იყო ხელმძღვანელობის, რომ ჩვენ არ უნდა ჩავრეულიყავით საინფორმაციო ბაზარზე, ამიტომ მთელი დღის განმავლობაში არ უნდა გაკეთებულიყო საინფორმაციო. მე ზაფხულში, როცა ეს გაირკვა, ითქვა, რომ GDS ამ მიმართულებით აღარ აპირებდა [განვითარებას]. ჩემთვის ეს საინტერესო აღარ იყო და შემდეგ უკვე, ახლა მიიღეს გადაწყვეტილება, როგორც ვხედავ, რომ საერთოდ ჩამოიცილეს პოლიტიკური ნაწილი“ - აღნიშნა მაღლაფერიძემ.

On.ge-ს ინფორმაციით, GDS-ზე გადაცემა 2030 იხურება, მსოფლიო ამბები და შუა დღის გადაცემა კი იანვრის ბოლოს აჩერებენ მუშაობას. 4 იანვარს ტელეკომპანიის საზოგადოებასთან ურთიერთობის სამსახურის ხელმძღვანელმა, თათა ძმანაშვილმა, კითხვაზე, დაიხურა თუ არა 2030, ან სხვა რომელიმე გადაცემა ასე უპასუხა: “ვერაფერს ვერ გეტყით. ამ ეტაპზე ჯერ ისვენებენ, არც ერთი გადაცემა არ გადის ჯერ." თუმცა, 3 იანვარს ეთერში გავიდა მსოფლიო ამბები.

GDS-ის საინფორმაციო სამსახურის უფროსს არ აქვს ინფორმაცია, დაიხურა თუ არა 2030. როგორც ის ამბობს, მისთვის ოფიციალურად არავის უცნობებია.