მოსკოვში უკვე 6 საათზე მეტია მიმდინარეობს სომხეთის, აზერბაიჯანისა და რუსეთის საგარეო საქმეთა მინისტრების შეხვედრა. მოლაპარაკებების პარალელურად კი კონფლიქტის ზონაში, ყარაბაღში შეტაკებები იყო.

სომხური მედია თავდაცვის სამინისტროს წარმომადგენლებზე დარყდნობით წერს, რომ აზერბაიჯანმა დღეს ეკლესია დაბომბა. მათი თქმით, ეკლესიას ორი ჭურვი მოხვდა და შედეგად ჟურნალისტები დაშავდნენ. სომხური მხარის განცხადებით, ამ "ვანდალურ აქტს" იმავე ფორმით არ უპასუხებენ.

აზერბაიჯანის პრეზიდენტი კი აცხადებს, რომ დღეს 9 სოფელი დაიბრუნეს. ის იმეორებს, რომ არა სომხურ, არამედ აზერბაიჯანის მიწაზე იბრძვიან.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

ბოლო მონაცემებით ბრძოლები რამდენიმე სხვადასხვა ლოკაციაზე მიმდინარეობს, ყველაზე აქტიური მათ შორის ყარაბაღის სამხრეთ და ჩრდილოეთ ნაწილებია. გარდაცვლილთა საერთო რიცხვი, როგორც სამხედროებს, ასევე, სამოქალაქო პირებს შორის რამდენიმე ასეული ადამიანია. თვითაღიარებული არცახის რესპუბლიკის (ყარაბაღი) პრეზიდენტის განცხადებით, განადგურებულია ცალკეული ქალაქებისა და სოფლების ინფრასტრუქტურა.