ჯანდაცვის მინისტრის მოადგილის, გიორგი წოწკოლაურის განცხადებით, გრიპის ვაქცინა ეტაპობრივად შემოვა საქართველოში და ჯერჯერობით მოწყვლად ჯგუფებს მოხმარდება. მისი თქმით, პირველ ეტაპზე, დაახლოებით, 300 000-მდე ვაქცინა იქნება შემოტანილი.

"დღეის მდგომარეობით, უკვე გადახდილი გვაქვს 16 მილიონზე მეტი, 18 მილიონ ლარამდე. ეტაპობრივად იქნება ვაქცინის შემოდინება საქართველოში. პირველ რიგში აღნიშნული შემოტანილი ვაქცინები მოხმარდება მოწყვლად ჯგუფებს და შემდეგ უკვე განევრცობა მთლიანად საზოგადოებაზე. დაახლოებით, 300 000-მდე იქნება შემოტანილი პირველ ეტაპზე და შემდგომ უკვე კიდევ გაგრძელდება ამის შემოტანა", — განაცხადა წოწკოლაურმა ჯანდაცვისა და სოციალურ საკითხთა კომიტეტის სხდომაზე.

გარდა ამისა, დაავადებათა კონტროლის ეროვნული ცენტრის ხელმძღვანელი, ამირან გამყრელიძე აცხადებს, რომ მომდევნო კვირიდან რისკჯგუფებში შემავალი ადამიანების სეზონურ გრიპზე აცრები დაიწყება.