ევროპული საქართველოს ლიდერი, გიგა ბოკერია, მიიჩნევს, რომ ხელისუფლების მხრიდან აზერბაიჯანთან საზღვრის თემაზე საქმის ფაბრიკაცია საქართველოში სამოქალაქო მშვიდობისთვის საფრთხეს ქმნის, ეთნიკური და რელიგიური შუღლის გამღვივებლებს საზრდოს აძლევს, მეზობელ ქვეყანასთან კი დამატებით პრობლემებს გვიქმნის.

მისივე განცხადებით, ივერი მელაშვილისა და ნატალია ილიჩოვას დაპატიმრება "ივანიშვილის რეჟიმის უმბდაბლესი სტანდარტებითაც კი სამარცხვინო შემთხვევაა".

"ამ ორ ადამიანს ედავებიან იმას, რაც არ მომხდარა. საქართველოსა და აზერბაიჯანს შორის სადემარკაციო შეთანხმება დავით გარეჯის მონასტრის მონაკვეთში არაა მიღწეული. ის რომ ამ ადამიანების წინააღმდეგ ბრალდება აბსურდულია, ყველამ იცის, თავად ხელისუფლების შიგნითაც.

მაშინ როცა ჩვენს ორ მეზობელ ქვეყანას შორის ომი მიმდინარეობს, ხელისუფლების მხრიდან ამ თემაზე საქმის ფაბრიკაცია, საქართველოში სამოქალაქო მშვიდობისთვის საფრთხეს ქმნის, ეთნიკური და რელიგიური შუღლის გამღვივებლებს საზრდოს აძლევს, მეზობელ ქვეყანასთან კი დამატებით პრობლემებს გვიქმნის.

ამ საქმეში ძალიან გამჭვირვალედ ჩანს ივანიშვილის ხელისუფლების თანამშრომლობა ღიად პროპუტინურ ჯგუფებთან. ეს თემა მათი მეშვეობით შეიქმნა და ისინი სრულ ჰარმონიაში მოქმედებენ როგორც პროკურატურასთან ისე ქართული ოცნების პროპაგანდასთან.

რუსეთი ივანიშვილის ხელისუფლების დასახმარებლად და საქართველოში სამოქალაქო მშვიდობის დასარღვევად, 2020 წლის საპარლამენტო არჩევნებში აქტიურადაა ჩართული. ტყუილისა და აბსურდის ნიაღვარი, რომელსაც ივანიშვილის ყოველთვის ასაზრდოებდა, ახლა სრულადაა მომართული ამ თემის ასატაცებლად", — წერს ბოკერია.

მისივე თქმით, ამ შეთითხნილი საქმით ოპოზიციის დემონიზება და მათ მიმართ სიძულვილის კამპანიის წარმოება მიმდინარეობს, ნაყალბევი მაგრამ უმძიმესი ბრალდებით - ქვეყნის ღალატი. მიზანი იგივეა - პოლარიზაცია, რითაც "ამომრჩეველს კვლავ ცრუ, შავ-თეთრ არჩევანს უხატავს ივანიშვილის პროპაგანდა".

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას პატიმრობა მიესაჯათ. მათ მიმართ სისხლის სამართლებრივი დევნა 7 ოქტომბერს დაიწყო.

დაკავებულებს ბრალი სისხლის სამართლის კოდექსის 308-ე მუხლის პირველი ნაწილით წარედგინათ, რაც გულისხმობს საქართველოს საწინააღმდეგო მოქმედებას, რომელიც მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ ანდა საქართველოს ტერიტორიიდან მისი ნაწილის გამოყოფისაკენ.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვი 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.