სტრატეგია აღმაშენებელი თბილისის მუნიციპალურმა ინსპექციამ 15 000 ლარით დააჯარიმა. პარტიის პრესსამსახურში On.ge-ს უთხრეს, რომ შემთხვევა დღეს, 8 ოქტომბერს მოხდა.

"როდესაც ჩვენი ერთ-ერთი ლიდერი, სერგო ჩიხლაძე აკეთებდა განცხადებას თავისუფლების მეტროს წინ, სადაც განთავსებული გვქონდა სამი გადასატანი ბანერი, მოვიდა ინსპექციის სამსახური და ადგილზე დაგვაჯარიმა. თითო 5 000 ლარით, ანუ ჯამში 15 000 ლარით. ერთ-ერთ მიზეზად დაასახლეს გარემოს, ქალაქის იერსახის დამახინჯება. რეალურად კი, ხელი შეგვიშალეს საარჩევნოდ", — განაცხადეს პარტიაში.

On.ge დაუკავშირდა მუნიციპალური ინსპექციის სამსახურს, სადაც აღნიშნული დაგვიდასტურეს და გვითხრეს, რომ პარტია ადმინისტრაციულ სამართალდარღვევათა კოდექსის 1503 მუხლის მეოთხე ნაწილის მიხედვით დაჯარიმდა, რაც გულისხმობს თბილისის მუნიციპალიტეტის ტერიტორიაზე კონსტრუქციების თვითნებურად განთავსებას — საქართველოს კანონით დადგენილ კულტურული მემკვიდრეობის დამცავ ზონაში.

სტრატეგია აღმაშენებელი წარსულშიც რამდენჯერმე დაჯარიმდა, მათ შორის, 5 ოქტომბერს თბილისის მერიასთან გამართულ აქციაზე. მუნიციპალურმა ინსპექციამ მაშინ ამის მიზეზად მიმდებარე ტერიტორიაზე კარვების თვითნებურად განათავსება დაასახელა და პარტია 1 000 ლარით დააჯარიმა.