საქართველოს ექსპრეზიდენტი, მიხეილ სააკაშვილი მორიგ ფეისბუქ ვიდეომიმართვაში, სახელმწიფო საზღვრის დელიმიტაცია-დემარკაციის კომისიის ყოფილი წევრის ივერი მელაშვილი დაკავებას აპროტესტებს. სააკაშვილის თქმით, ამით ხელისუფლება ქვეყანაში შექმნილი მძიმე ვითარების გადაფარვას ცდილობს.

"სახელმწიფო ინსტიტუტების რღვევა, ხალხის გაღატაკება, ძარცვა, ერთი ახირებული ფეოდალის პირად საკუთრებად ქცევა. მათ ამ ყველაფრის გადაფარვა სურთ ისეთი სისულელით, რომელსაც სამი წლის ბავშვიც არ დაიჯერებს", — აცხადებს სააკაშვილი.

საქართველოს მესამე პრეზიდენტის თქმით, ხელისუფლება მალე შეიცვლება და ამას წინ ვერავინ დაუდგება.

"სულ ცოტაც, კიდევ გაძელით, ეს მარაზმი რამდენიმე კვირაში დასრულდება, საქართველოში ყველაფერი შეიცვლება, ქვეყანა ძალიან სწრაფი ტემპით დაიწყებს წინ მოძრაობას და ვერავინ შეძლებს ქაოსი და არეულობა შექმნას. ვერც ჩვენს მეზობლებთან და ვერც ქვეყნის შიგნით. საქართველოში მოხდება ხელისუფლების მშვიდობიანი ცვლა დემოკრატიული გზით და ამას წინ ვერანაირი სიცრუე ვერ დაუდგება", — აცხადებს ის ვიდეომიმართვაში.

დღეს ცნობილი გახდა, რომ აზერბაიჯანთან საზღვრის შეთანხმების საქმეზე სამთავრობო კომისიის ყოფილი წევრი და ექსპერტთა ჯგუფის ხელმძღვანელი, ივერი მელაშვილი, ასევე, კომისიის ექსპერტ-კარტოგრაფი ნატალია ილიჩოვა დააკავეს.

პროკურატურის ბრალდებისა და ექსპერტიზების დასკვნის შესახებ დეტალურად წაიკითხეთ აქ