ევროპული საქართველოს წევრი, ირაკლი აბესაძე, პანდემიის მასობრივ გავრცელებასა და არჩევნების შესაძლო გადავადებას ეხმაურება.

აბესაძის თქმით, ქართული ოცნების წარმატებული კრიზისმენეჯერობა ფარსი აღმოჩნდა და ეკონომიკის დრაკონულმა ჩაკეტვამ, ერთი მხრივ, გააჩერა ეკონომიკა და ათიათასობით ადამიანს დააკარგვინა სამუშაო, ხოლო, მეორე მხრივ, ვერ შეუწყო ხელი პანდემიის გაჩერებას.

აბესაძემ აღნიშნა, რომ მიუხედავად პანდემიის მასობრივი გავრცელებისა, არჩევნების არანაირ გადავადებაზე საუბარი არ შეიძლება.

"ქართული ოცნების წარმატებული კრიზისმენეჯერობა, სამწუხაროდ, სრული ფარსი აღმოჩნდა და ჩვენ კარგად ვხედავთ, რომ რეალურად, დრაკონული, ძალიან მძიმე ჩაკეტვების მიუხედავად, რომელიც იყო აშკარად გადაჭარბებული და ამან დაანგრია ეკონომიკა და ათიათასობისთ ადამიანი უსაფუძვლოდ დატოვა უმუშევარი და შემოსავლის გარეშე, საბოლოო ჯამში, მაინც მივიდა იქამდე, რომ გვაქვს ფართოდ გავრცელებული შიდა და ფაქტობრივად უკონტროლო გადაცემა განსაკუთრებით აჭარის რეგიონში, თუმცა დანარჩენ საქართველოშიც.

ასე რომ ამ მიმართულებით მისაქცევია ყურადღება და, რა თქმა უნდა, სჭირდება უკეთესი მენეჯმენტი და მიდგომა ამ საკითხების მოგვარებას, თუმცა ჯერ-ჯერობით არჩევნების არანაირ გადადებაზე საუბარი არ შეიძლება. რა მდგომარეობაც დღეს ჩვენ გვაქვს, ჩვენ ვატარებთ სრულფასოვნად კამპანიას და მიგვაჩნია, რომ ამის საფუძველი ჯერ-ჯერობით არ არის", — აცხადებს აბესაძე.