ევროპული საქართველოს წევრის, ირაკლი აბესაძის განცხადებით, ქართული ოცნების ლიდერმა, ბიძინა ივანიშვილმა იპოდრომის ტერიტორია ორად გაყო და ეკონომიკურად ნაკლებად მომგებიანი ნაწილი თბილისის მერიას გადასცა.

"ივანიშილმა 2020 წლის ივნისში, რამდენიმე თვის უკან იპოდრომის ტერიტორია გაყო ორ ნაწილად — ცენტრალური მოედანი, სადაც ნულოვანი ეკონომიკური ინტერესი შეიძლება ჰქონოდა ივანიშვილს და ვერანაირ მოგებას ვერ ნახავდა იმიტომ, რომ აქ მშენებლობას უბრალოდ საზოგადოება არ დაუშვებს, გადასცა სახელმწიფოს, ხოლო 8 ჰექტარი მიწის ნაკვეთი თამარაშვილის ქუჩის მხარეს, ყველაზე ხშირი გამწვანება, რომელიც იპოდრომის ტერიტორიაზე არის და, რომელიც მთლიანი იპოდრომის ორგანული ნაწილი იყო თავიდანვე, ქართუ ჯგუფმა დაიტოვა საკუთრებაში", — განაცხადა აბესაძემ.

5 ოქტომბერს, თბილისის მერიამ გაავრცელა ინფორმაცია, რომ ყოფილი პრემიერმინისტრი და ქართული ოცნების ლიდერი, ბიძინა ივანიშვილი ქალაქს იპოდრომს გადასცემს, სადაც ფონდი ქართუს დახმარებით გაშენდება თბილისის ცენტრალური პარკი, რომელიც რამდენიმე ათეული მილიონი დაჯდება.