ექსპრეზიდენტ მიხეილ სააკაშვილის განცხადებით, მომღერალი ბუბა კიკაბიძე, რომელიც საარჩევნო ბლოკ ძალა ერთობაშიას პირველი ნომერია, მთელ მსოფლიოში, განსაკუთრებით კი პოსტსაბჭოთა სივრცეში, საქართველოს სავიზიტო ბარათია. ამის შესახებ სააკაშვილი Facebook-ის საკუთარ გვერდზე წერს.

"ბუბა კიკაბიძე მთელმა საბჭოთა რუსეთის თაყვანისმცელთა ბრიგადამ ჩვენს სიაში მტრის აგენტად და ოკუპანტის წარმომადგენლად გამოაცხადა. ადამიანს ზუსტად ის უნდა დააბრალო, რაც არ არის — ეს მათი საყვარელი ხელწერაა! ბუბა კიკაბიძე მთელს მსოფლიოში საქართველოს სავიზიტო ბარათია, განსაკუთრებით პოსტსაბჭოთა სივრცეში. ის არ არის მხოლოდ მომღერალი და მსახიობი, უფრო მეტიც, ის ძალიან მნიშვნელოვანი საზოგადო მოღვაწე, კარგი გაგებით პოლიტიკოსი და, რაც მთავარია, დიდი ქართველი პატრიოტია", — წერს სააკაშვილი.

მისივე თქმით, ბუბა კიკაბიძის პასუხი "ყველა რუსეთუმის შეტევაზე" მისი სიმღერაა, რომელიც 2008 წელს დაწერა და რომლითაც ის "რუსეთის ე.წ. ლიბერალურ შემოქმედებით ინტელიგენციას საბოლოოდ გაემიჯნა".

მომღერალი ვახტანგ (ბუბა) კიკაბიძე საარჩევნო ბლოკ ერთიანი ნაცინალური მოძრაობა — ძალა ერთობაშიას პროპორციული სიის პირველი ნომერია. ბლოკმა სია ცესკოში პირველ ოქტომბერს დაარეგისტრირა. ბუბა კიკაბიძეს პოლიტიკურ გეგმებზე მედიასთან ამ დრომდე არ უსაუბრია.