პარტია რეფორმერის მაჟორიტარი დეპუტატობის კანდიდატი ბათუმის ოლქში, ჯეირან ოქროპირიძე ხელვაჩაურის მუნიციპალიტეტში მომხდარ სტიქიურ უბედურებას ეხმაურება და თანადგომას უცხადებს გარდაცვლილების ოჯახებს.

როგორც ცნობილია, ხელვაჩაურის სოფლებში ძლიერი წვიმისგან გამოწვეულ მეწყერს ადამიანების სიცოცხლე ემსხვერპლა, სამაშველო სამსახურები კვლავ ეძებენ დაკარგულ ადამიანებს.

"ეს არის დიდი ტრაგედია. ვუთანაგრძნობ გარდაცვლილი ადამიანების ოჯახებს. ძალიან სამწუხაროა, რომ მეწყერმა ისევ შეიწირა ჩვენი მოქალაქეების სიცოცხლე და ვერ შევძელით ტრაგედიის თავიდან აცილება. აჭარაში ბევრი მეწყერსაშიში ზონაა, სადაც ადამიანებს ცხოვრება უწევთ ძალიან დიდი რისკის ქვეშ. ჩვენ არაერთხელ გავხდით მომსწრე როგორ შეეწირნენ სტიქიას ადამიანები და როგორ დარჩნენ დამეწყრილ სოფლებში ოჯახები უსახლკაროდ.

ამ პრობლემების გადაჭრას და მეწყერსაშიშ ზონებში მცხოვრები ადამიანების დახმარებას ქმედითი ნაბიჯების გადადგმა სჭირდება. ამისთვის საჭიროა ბიუჯეტის სწორი დაგეგმვა და აქტიური პრევენციული ზომების გატარება, მათ შორის, მეწყერსაშიში ფერდობების გასამაგრებლად. სტიქიასთან ბრძოლა მხოლოდ სტიქიისგან დანგრეული ინფრასტრუქტურის აღდგენა და ოჯახების დახმარება არაა. უნდა განხორციელდეს კომპლექსური პროექტები, რაც მეწყრული და სტიქიური პროცესების რისკებს აგვაცილებს თავიდან", — აცხადებს ჯეირან ოქროპირიძე.