საქართველოს შინაგან საქმეთა სამინისტროს ინფორმაციით, 29 სექტემბერს, ღამის საათებში, დმანისში, სოფელ ოროზმანის მიმდებარე ტერიტორიაზე განთავსებულ კაბელების მანიშნებელ ბოძთან, ამ დრომდე დაუდგენელმა პირებმა/პირმა მიწა ამოიღო და მიწის სიღრმეში არსებული ოპტიკურ-ბოჭკოვანი სატელეკომუნიკაციო ქსელის კაბელები დააზიანა. უწყებაში აღნიშნავენ, რომ კაბელები შპს ოპტიკურ-ბოჭკოვან სატელეკომუნიკაციო ქსელს ეკუთვნოდა.

"[დაუდგენელმა პირმა/პირებმა] გადაჭრა კომპანიის კუთვნილი, საერთაშორისო მნიშვნელობის მქონე, შავი ზღვიდან შემომავალი, ევროპისა და აზიის დამაკავშირებელი, ფოთი-თბილისი-ბოლნისი-დმანისი-სომხეთის მიმართულებით გამავალი ოპტიკურ-ბოჭკოვანი კაბელები", — აღნიშნავენ უწყებაში.

მათივე ინფორმაციით, ამის შესახებ შსს-ს კომპანიის წარმომადგენელმა აცნობა და გამოძიება საერთაშორისო მნიშვნელობის მქონე ოპტიკურ-ბოჭკოვანი კაბელების დაზიანების ფაქტებზე დაიწყო.

გარდა ამისა, უწყებაში ავრცელებენ ინფორმაციას კიდევ ერთ შემთხვევაზე, კერძოდ კი, სოფელ სადახლოში კომპანია სილქნეტის ოპტიკურ-ბოჭკოვანი კაბელის დაზიანებაზე.

"ადგილზე მისულმა კომპანიის წარმომადგენლებმა ნახეს, რომ გადაჭრილი იყო წყლის არხზე გადამავალი ოპტიკურ-ბოჭკოვანი კაბელი. აღნიშნული კაბელით ხდება ინტერნეტით ადგილობრივი მოსახლეობის უზრუნველყოფა და იგი, ასევე, უკავშირდება სომხეთის რესპუბლიკას", — აღნიშნავენ შსს-ში.

უწყების ინფორმაციით, ორივე შემთხვევაზე შესაბამისმა სამსახურებმა სწრაფი რეაგირება მოახდინეს, ამ დროისთვის პრობლემა აღმოფხვრილია და ინტერნეტის მიწოდება შეუფერხებლად ხდება.

სამინისტროს ინფორმაციით, ტარდება აქტიური საგამოძიებო მოქმედებები, ასევე, ინტენსიურად მიმდინარეობს ოპერატიულ-სამძებრო სამუშაოები დანაშაულში მონაწილე პირების დადგენა-დაკავების მიზნით.