დაავადებათა კონტროლის ეროვნულიც ცენტრის ხელმძღვანელის, ამირან გამყრელიძის თქმით, ტესტირების პროტოკოლის შეცვლა მიმდინარეობს და მანდატორული ტესტირება გაფართოვდება. ამის შესახებ მან საკოორდინაციო საბჭოს დასრულების შემდეგ გამართულ ბრიფინგზე ისაუბრა.

"გარკვეული ცვლილებები შევა ტესტირების პროტოკოლებში. ანუ ლისტში ადამიანებისა, ვინც დღეს ექვემდებარებოდნენ მანდატორულ ტესტირებას და გაფართოვდება გარკვეულად, ზოგიერთი ჯგუფი შეიძლება ამ ეტაპზე ამოღებული იქნეს და დაემატოს ჩემი კოლეგები, იმიტომ, რომ ეპიდსიტაციის გართულებასთან დაკავშირებით დღეს მეტი ტვირთი გადადის ჩემს კოლეგებსა და სამედიცინო სექტორზე, რომელიც არიან მომატებული რისკი ინფიცირებისა. ჩვენ ვტესტავდით Covid-19-ის კლინიკების თანამშრომლებს, ვტესტავდით რეანიმაციისა და ინტენსიური თერაპიის თანამშრომლებს და ეს სფერო კიდევ და კიდევ უნდა გაფართოვდეს", — განაცხადა გამყრელიძემ.

მისივე თქმით, ამ ეტაპზე შესაძლებელია, რომ სამედიცინო პერსონალის ტესტირება დაიწყოს, ხოლო საზოგადოებრივი ტრანსპორტის მძღოლების და პოლიციელების შემოწმების დროებით შეწყდეს.

"ამ ეტაპზე ვფიქრობთ, რომ ყველაზე დიდი რაოდენობით ჩვენ ვტესტავთ ჩვენთვის ყველაზე საპატივცემულო, დიდ კოჰორტას, პოლიციელების სახით და იქ გვაქვს თითქმის ნულოვანი აღმოჩენის მაჩვენებელი და შესაძლებელია, შემოდგომის გარკვეული პერიოდით ისინი შევაჩეროთ და ჩანაცვლდნენ ისინი სამედიცინოს სფეროს წარმომადგენლებით. ასევე არ გვქონია შემთხვევა საზოგადოებრივი ტრანსპორტის მძღოლებზე და ამაზეც ვფიქრობთ", — განაცხადა გამყრელიძემ.

2 ოქტომბრის მონაცემებით, სულ ქვეყანაში კორონავირუსის 7 093 შემთხვევაა დადასტურებული. აქედან 3 714 ადამიანი უკვე გამოჯანმრთელდა, 46 კი გარდაიცვალა.

კარანტინში 5 392 პირი იმყოფება, სტაციონარში მეთვალყურეობის ქვეშ — 836.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: