საფრანგეთის გარემოს დაცვის მინისტრის განცხადებით, ქვეყანაში ეტაპობრივად აიკრძალება გარეული ცხოველების მონაწილეობა მოხეტიალე ცირკების წარმოდგენებში, ასევე აიკრძალება ცხოველების მოშენება ბეწვეულის ინდუსტრიისთვის და დელფინების და ცელნამგალა ვეშაპების დატყვევება დელფინარიუმებსა და საზღვაო პარკებში.

ქვეყნის ეკოლოგიური გადასვლის მინისტრმა, ბარბარა პომპილიმ, პრესკონფერენციაზე განაცხადა, რომ "მომდევნო წლებში" დაუშვებელი იქნება დათვების, ვეფხვების, ლომების, სპილოების და სხვა გარეული ცხოველების გამოყენება საცირკო წარმოდგენებში.

ამასთან, პომპილიმ დასძინა, რომ საფრანგეთში არსებულ სამ საზღვაო პარკს დაუყოვნებლივ მიეცემათ მითითება, აღარ მოაშენონ დელფინები და ცალნამგალა ვეშაპები.

"დროა, გარეულ ცხოველებთან ჩვენი ურთიერთობის ახალი ერა დავიწყოთ", — აცხადებს იგი და აღნიშნავს, რომ ცხოველთა კეთილდღეობა პრიორიტეტულია.

მინისტრის თქმით, გათვალისწინებული შეზღუდვებით მომდევნო ხუთ წელიწადში აიკრძალება ცხოველთა მოშენება ბეწვეულის ინდუსტრიისთვისაც.

მიუხედავად ამისა, აკრძალვები არ ეხება სხვა გარეულ ცხოველებს, რომლებიც მუდმივ წარმოდგენებში მონაწილეობენ ან ზოოპარკში არიან.

პომპილის ზუსტი თარიღი არ დაუსახელებია, როდის ამოქმედდება აკრძალვა მოხეტიალე ცირკებისათვის. მისი თქმით, ეს პროცესი "რაც შეიძლება, მალე" დაიწყება და გამოსავალი თითოეული ცხოველისთვის კონკრეტული შემთხვევის მიხედვით იქნება მოძებნილი.

აღსანიშნავია ისიც, რომ საფრანგეთის მთავრობა 8 მილიონ ევროს გამოყოფს ცირკებსა და საზღვაო პარკებში მომუშავე ადამიანების დასახმარებლად, რათა მათ ახალი სამსახურის პოვნა შეძლონ.

"ეს გადასვლა რამდენიმე წელიწადს გაგრძელდება, რადგან იგი არაერთი ადამიანის ცხოვრებასაც ცვლის", — აცხადებს პომპილი.

მსოფლიოში უკვე რამდენიმე წელია, მასობრივად აპროტესტებენ ცხოველთა ექსპლუატაციას გასართობ და კომერციულ ინდუსტრიაში. უდიდესმა ცხოველთა უფლებადამცველმა ორგანიზაციამ PETA (ადამიანები ცხოველთა ეთიკური მოპყრობის მხარდასაჭერად) არაერთი კვლევა და ვიდეოჩანაწერი გაავრცელა, სადაც ნაჩვენებია, როგორ წვრთნიან ცხოველებს ცირკებში. ასევე რატომ არის დაუშვებელი დელფინარიუმების და საზღვაო პარკების არსებობა.

ცნობილი ადამიანების მოთხოვნის შემდეგ 2017 წელს აშშ-ში ერთ-ერთი ყველაზე დიდი ისტორიის მქონე ცირკი დაიხურა. ცხოველთა საცირკო წარმოდგენებში მონაწილეობა აიკრძალა არაერთ ქვეყანაში, ალტერნატივად კი, მაგალითად, გერმანიამ ჰოლოგრამული გამოსახულებები წარმოადგინა.

რაც შეეხება საქართველოს, ქართველი ცხოველთა უფლებადამცველები წლებია, მოითხოვენ, აიკრძალოს ცხოველების ცირკში მონაწილეობა. ყველაზე მასშტაბური სახე პროტესტმა გასულ წელს მიიღო, როცა კამპანიის #ცირკიცხოველებისგარეშე ფარგლებში შეიქმნა პეტიცია და ჩატარდა აქცია თბილისის ცირკის შენობასთან. პროტესტის საფუძველი საქართველოში იური ნიკულინის ცირკის ჩამოსვლა იყო, რომელიც წარმოდგენებში ცხოველებს იყენებს. მიუხედავად მრავალწლიანი ბრძოლისა, საქართველოში ცხოველთა ექსპლუატაცია კანონით არ იკრძალება, შესაბამისად, მათ დასაცავად ქვეყანაში არანაირი ბერკეტი არ არსებობს.