ქართული ოცნების ლიდერი, მამუკა მდინარაძე ამბობს, რომ მარნეულში ევროპული საქართველოს აქტივისტისთვის ტირის თოფიდან სროლის ამბავში "გარკვეული სპექტაკლის ნიშნები იკვეთება". ამის შესახებ მან ბრიფინგზე ისაუბრა.

როგორც მდინარაძე ამბობს, მათი აქტივისტები სროლის ამბავზე ინფორმაციის მოპოვებას ცდილობენ, თუმცა უშედეგოდ.

"უკვე ერთ დღეზე მეტია ვცდილობთ მოვიძიოთ ინფორმაცია, ლამის გამომძიებლები გახდნენ ჩვენი აქტივისტები, იქნებ დაეხმარონ გამოძიებას ვინ მიაყენა რაღაც დაზიანება კირის თუ ტირის თოფით. [...] ძალიან არ მინდა, აღმოჩნდეს მათ მიერ მოწყობილი სპექტაკლი. ფაქტები რაც არის, იქ პროვოკაციის აშკარა ნიშნებია. არ გამოვრიცხავ, მაგრამ დარწმუნებით არ შემიძლია თქმა, აქაც გარკვეული სპექტაკლის ნიშნები იკვეთება", — განაცხადა მდინარაძემ.

მარნეულში პარტია ევროპული საქართველოს მაჟორიტარობის კანდიდატის, ახმედ იმამკულიევის განცხადებით, მათ ერთ-ერთ აქტივისტ რამილ აბდულაევს ფეხში ტირის თოფიდან მაშინ ესროლეს, როცა ის ბოძზე ბანერს ამაგრებდა.

"ბოძზე როცა ამაგრებდნენ ბანერს, მოვიდნენ მერის წარმომადგენლები და დაიწყეს დაშინებები და მუქარები. ჩვენ არ მოგცემთ საშუალებას, ეს ბანერი აქ იყოსო. რამილი ბანერს ამაგრებდა, როცა ფეხზე ძალიან დიდი ტკივილი იგრძნო. ძირს ჩავარდებოდა, ბიჭებს რომ არ დაეჭირათ. მერე ქვემოთ იპოვეს ტირის ტყვია რომ ეგდო", — განაცხადა იმამკულიევმა.

სოფელ სადახლოში მომხდართან დაკავშირებით გამოძიება სისხლის სამართლის კოდექსის 120-ე მუხლით დაიწყო, რაც ჯანმრთელობის განზრახ მსუბუქ დაზიანებას გულისხმობს.