აფხაზეთის ომში დაღუპული ქართველ გენერალ-მაიორს, გენო ადამიას საქართველოს უმაღლესი სახელმწიფო ჯილდო — ეროვნული გმირის ორდენი მიენიჭა. ეროვნული გმირის წოდება გენო ადამიას გარდაცვალების შემდეგ პრემიერმინისტრის წარდგინების საფუძველზე პრეზიდენტმა მიანიჭა.

მთავრობის ადმინისტრაციაში გამართულ ღონისძიებაზე აგრეთვე აღინიშნა, რომ სენაკში #1 საჯარო სკოლას გენო ადამიას სახელი მიენიჭება.

გენო ადამია 1992 წლის აგვისტოში 23-ე ბრიგადის მეთაურის მოადგილედ, ამავე წლის სექტემბერში კი ბრიგადის მეთაურად და სოხუმის გარნიზონის უფროსად დაინიშნა. მის სახელს უკავშირდება სოხუმის დასაცავად განხორციელებული თითქმის ყველა მნიშვნელოვანი და წარმატებული სამხედრო ოპერაცია. გენო ადამიასთან ერთად იბრძოდა მისი ორი ვაჟი.

გენერალი გენო ადამია კოდორის ხიდზე, სოხუმის დაცემიდან მეორე დღეს, 1993 წლის 28 სექტემბერს დაიღუპა. ის კოდორის ხიდთან მოკლეს, როდესაც უკან, სოხუმში შესვლას ცდილობდა. დაკრძალულია თბილისის ძმათა სასაფლაოზე.

გენო ადამიას სიკვდილის შემდეგ ასევე მიღებული აქვს ვახტანგ გორგასლის I და III ხარისხის ორდენები.

სოხუმის დაცემიდან დღეს 27 წელი გავიდა. სამხედრო დაპირისპირება აფხაზეთში 1992 წლის 14 აგვისტოს დაიწყო. კონფლიქტი 13 თვესა და 13 დღეს გრძელდებოდა. სოხუმისთვის ბრძოლა კი 11 დღის განმავლობაში მიმდინარეობდა და ქალაქის დაცემით დასრულდა.

სოხუმის დაცემის 27 წლისთავთან დაკავშირებით და აფხაზეთის ომში, დაღუპულთა ხსოვნის პატივის მიგების მიზნით, ყველა სახელმწიფო უწყების შენობაზე სახელმწიფო დროშა დაეშვა.