საზოგადოებრივი მაუწყებლის გენერალური დირექტორის ვაკანტურ თანამდებობაზე განაცხადი რეგიონულ მაუწყებელთა ასოციაციის აღმასრულებელმა დირექტორმა, ნათია კუპრაშვილმა შეიტანა. კუპრაშვილმა განაცხადი კონკურსის დასრულების ბოლო დღეს, 28 დეკემბერს შეიტანა. როგორც კუპრაშვილმა რუსთავი 2-ს უთხრა, კონკურსის მთავარი სისუსტე კანდიდატების ნაკლებობაა:

"ამ კონკურსის მთავარი სისუტე შეიძლებოდა ყოფილიყო კანდიდატების სიღარიბე. როცა არ არის არჩევანი, კარგი არჩევანი ვერ გაკეთდება. სწორედ ამიტომ, მე მიხარია, რომ ჩემთვის პატივსაცემი ადამიანებიც იღებენ მონაწილეობას ამ კონკურსში."

საზოგადოებრივი მაუწყებლის დირექტორის ვაკანსიაზე განცხადება ასევე შეიტანა რამაზ სამხარაძემ, რადიო ჰერეთისა და რადიო თბილისის დამფუძნებელმა.

დირექტორობის მსურველთა სრულ სიას საზოგადოებრივი მაუწყებელი დღეს, განაცხადების მიღების დასრულებისთანავე გამოაქვეყნებს, მანამდე კი შეგიძლიათ ნახოთ არასრული სია, თუ ვის სურს მაუწყებლის დირექტორობა.

21 ნოემბერს საზოგადოებრივი მაუწყებლის სამეურვეო საბჭომ დააკმაყოფილა უკვე ყოფილი გენერალური დირექტორის, გიორგი ბარათაშვილის განცხადება თანამდებობის დატოვების შესახებ. მაუწყებლის გენერალური დირექტორის ვაკანტურ პოზიციაზე აპლიკაციების მიღება 29 ნოემბერს დაიწყო.