ლელოს ერთ-ერთი ლიდერი და გლდანის მაჟორიტარი დეპუტატობის კანდიდატი გიგლა მიქაუტაძე ქართული ოცნების წევრ რომან კაკულიას სატელევიზიო დებატებში ეპატიჟება. როგორც მიქაუტაძე ამბობს, კაკულიას ლელოს "მარშალის გეგმასთან" დაკავშირებით კითხვები აქვს და მზადაა ამ კითხვებზე ნებისმიერ დროს და ადგილას უპასუხოს.

"ვთავაზობ მას, ვისაუბროთ არა მხოლოდ ლელოს პროგრამაზე, არამედ ქართული ოცნების გეგმაზეც, თუ ასეთი არსებობს ბუნებაში. მე ყოველდღე ვხვდები სასოწარკვეთილ ადამიანებს გლდანის რაიონში, რომლებიც ვერ გრძნობენ ხელისუფლების არსებობას ქვეყანაში. მათ არავინ სცემს პასუხს კატასტროფულად გაუფასურებულ ლარზე და სესხებზე, რომლის გადახდის ვალდებულება თვის ბოლოს დაუდგებათ.

ხელისუფლებამ, ეროვნულ ბანკთან ერთად, უნდა შექმნას სავალუტო დერეფანი — ლარის კურსის ქვედა და ზედა დროებითი ზღვარი, რომელიც დაასტაბილურებს ეროვნულ ვალუტას და ჩააქრობს პანიკას. მან ასევე უნდა შეიმუშაოს სესხების რეფინანსირების ახალი მექანიზმი, რათა მოხდეს ძველი სესხების ახლით გადაფარვა და ექვსთვიანი საშეღავათო პერიოდის დაწესება. თუ ქართულ ოცნებას არ მოგწონთ ლელოს მოდელი, წარმოგვიდგინეთ თქვენი ვერსია. უთხარით ხალხს, რას აპირებთ მათი მდგომაროების გასაუმჯობესებლად. გაეცით არა ჩემს, არამედ ჩვენი თანამოქალაქეების კითხვებს პასუხი", — განაცხადა გიგლა მიქაუტაძემ.