საზოგადოებრივი მაუწყებლის დირექტორობის კანდიდატი ირმა სოხაძე ფიქრობს, რომ საზოგადოებრივ მაუწყებელს უფროსი თაობის წამყვანი სჭირდება, მიზეზად კი იმას ასახელებს, რომ ახალგაზრდა წამყვანების არ სჯერა და ჰგონია, რომ მისთვის საინტერესო თემაზე არ ლაპარაკობენ. მისივე თქმით, მაუწყებელს თინეიჯერები არ უყურებენ და ძირითადი მაყურებელი უფროსი თაობაა, ამიტომ მათი მოზიდვა უნდა სცადონ.

"თითქოს, ეიჯიზმის ნიშნით, 40 წელს ზემოთ არ ზის არც წამყვანი, არც გადაცემის ავტორი [საზოგადოებრივ მაუწყებელში]. ახლა ცოტა შეიცვალა, ძალიან კარგი გადაცემაა ტელესკოლა მეორე არხზე. ასე, არ შეიძლება, რატომ იცით? იმას რომ თავი დავანებოთ სხვა მსგავს ტელევიზიებს, საზოგადოებრივ მაუწყებლებს, ჩვენი მაყურებელი ძირითადი მაინც არის ცოტა უფროსი თაობა. მე არ მგონია, ჩვენ თინეიჯერები გვიყურებდნენ, რატომღაც. იმიტომ, რომ ისინი სხვა რაღაცეებით არიან დაკავებული ძირითადად.

ამიტომ ამაზეც უნდა ვიფიქროთ, რომ ჩვენი წამყვანების ავტორიტეტით მათი რაღაც... თუნდაც ასაკობრივი, ჩემიანს რომ ვხედავ, მე უფრო მჯერა მისი, ვიდრე პირტიტველა, ლამაზ, საყვარელ, მაგრამ ბავშვს, რომლისაც რატომღაც არ მჯერა. არ მგონია, რომ ის იმას აკეთებს და ლაპარაკობს, რაც ჩემთვის საინტერესო და მისაღებია", — განაცხადა მან სამეურვეო საბჭოს წევრებთან გასაუბრებისას.

საბჭოს ერთ-ერთი წევრი არ დაეთანხმა სოხაძეს და განაცხადა, რომ არხზე 40 წელს ზევით წამყვანები მუშაობენ. მან მაგალითად დათო ევგენიძე და აკა მორჩილაძე დაასახელა, რაზეც სოხაძემ განაცხადა:

"არა, ეგ არ აღიქმება უფროს თაობად. აი, ჩემი თაობა და ბატონი გიას თაობა".

საბჭოს წევრმა გააპროტესტა ის მოსაზრებაც, რომ არხზე ეიჯიზმია, პასუხად კი სოხაძემ თქვა:

"ცოტა არის [ეიჯიზმი]. არა, ნუ, აი, ახლა გეუბნებით, მარიკა კვალიაშვილმა დამირეკა, მარიკას კონცერტი ვერ გავუშვით პირველ არხზე. არა, მე არ ვამბობ, რომ მარიკო დავჩაგრეთ და იმიტომ არ გავუშვით, ფაქტია, რომ ვერ გავუშვით. ამხელა ქალბატონმა ვარსკვლავი გახსნა, ფანტასტიური კონცერტი იყო. ნაწილ-ნაწილ მაინც, ცოტა დიდი გამოვიდა. მე ვეუბნებოდი მარიკოს, სამსაათიან კონცერტს ვერცერთი მაუწყებელი ვერ გაუშვებს. ორ ნაწილად გაგვეყო".

ამავდროულად, მან გააპროტესტა ის ფაქტი, რომ მაუწყებლიდან გაათავისუფლეს გამოცდილი, ასაკოვანი პროფესიონალები.

ამავე თემაზე:

საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით.