აზერბაიჯანში გამართულ თავდაცვის მინისტერიალზე, რომელსაც თურქეთის თავდაცვის მინისტრიც ესწრებოდა, საქართველოს თავდაცვის მინისტრმა თინა ხიდაშელმა ყარაბაღის კონფლიქტის შესახებ თქვა, რომ საქართველოსთვის დღეს ყველაზე მნიშვნელოვანი რეგიონის სტაბილურობაა და ამ მიზნით ქვეყანა ყველა მეზობელთან სათანადოდ თანამშრომლობს:

"ჩვენ არ ვირჩევთ, არჩევანს არ ვაკეთებთ! მე ერევანში ვიყავი 2016 წლის იანვარში, სადაც ვთქვი, რომ აზერბაიჯანი და თურქეთი საქართველოს სტრატეგიული პარტნიორები არიან. საქართველოს ბევრი მეგობარი, პარტნიორი ჰყავს. ჩვენ ბევრ ქვეყანასთან ვმუშაობთ. ყველაზე მნიშვნელოვანი დღეს საქართველოსთვის რეგიონში მშვიდობაა".

თინა ხიდაშელმა ასევე აღნიშნა, რომ თავდაცვის სამინისტრო მუშაობს სომხეთთანაც, თუმცა საქართველოსთვის სტრატეგიული თანამშრომლობა თურქეთთან აქვს:

"მაგრამ, არსებობს პარტნიორობა, გზა, სადაც ერთად მივდივართ - თურქეთი ნატოს წევრია, საქართველოს ნატოს წევრობა სურს. ეს ჩვენს სტრატეგიულ თანამშრომლობას განსაზღვრავს. სომხეთმა განსხვავებული არჩევანი გააკეთა, ის ევრაზიულ კავშირში შევიდა, ჩვენ იქ შესვლას არ ვაპირებთ. ეს ასევე განსაზღვრავს სომხეთთან ჩვენი თანამშრომლობის დონეს - მეგობრულს, სტრატეგიული თანამშრომლობის გარეშე".

თავდაცვის მინისტრმა აღნიშნა, რომ მშვიდობისთვის ყველა მეზობელთან ითანამშრომლებს, მათ შორის რუსეთთანაც, თუ ის საქართველოს ტერიტორიულ მთლიანობას აღიარებს.