ევროპულმა საქართველომ საპარლამენტო არჩევნებზე ბათუმის მაჟორიტარობის კანდიდატად ქართული ოცნების ყოფილი აღმასრულებელი მდივანი და ყოფილი პოლიტსაბჭოს წევრი, არმაზ ახვლედიანი დაასახელა.

ევროპული საქართველოს ერთ-ერთი ლიდერის, დავით ბაქრაძის თქმით, არმაზ ახვლედიანი არის პიროვნება, რომელმაც იცის, თუ რა სჭირდებათ როგორც ბათუმელებს, ისე მთლიან საქართველოს გარდამტეხი ცვლილებებისათვის.

"ძალიან მოხარული ვარ, წარმოგიდგინოთ კიდევ ერთი ადამიანი, რომელიც შემოუერთდა ევროპული საქართველოს გუნდს; ადამიანი, რომელიც არის თავისი ქალაქის, ბათუმის და თავისი ქვეყნის, საქართველოს ნამდვილი მოყვარული; ადამიანი, რომელმაც იცის, რა სჭირდება ხალხს და რა უნდა გააკეთოს ხალხისათვის.", — განაცხადა დავით ბაქრძემ.

არმაზ ახვლედიანი 2016 წლამდე პარტია ქართულ ოცნების პოლიტსაბჭოს წევრი იყო. პარტიის დატოვების შემდეგ მან განმარტა, რომ მმართველი ძალა წლების განმავლობაში ახერხებდა, გაეყალბებინა არჩევნები; სასურველი შედეგი მოეტანა ხელმძღვანელობისთვის; მათთვის ყველაფერზე ეთქვა კი და არასდროს — არა.