ქართული ოცნების დეპუტატი ენზელ მკოიანი, რომელიც ახალქალაქისა და ნინოწმინდის მაჟორიტარად დამოუკიდებლად კენჭისყრას აპირებს, ამბობს, რომ მისი ოჯახის წევრებზე წინასაარჩევნოდ ზეწოლა ხორციელდება.

დეპუტატის თქმით, მისი ძმის, მარტუნ მკოიანის გაზის კომპანიაში 17 სექტემბერს ფინანასთა სამინისტროს საგამოძიებო სამსახური შევიდა. მან დოკუმენტების დალუქვისა და გატანის ამსახველი კადრები გაავრცელა.

მკოიანის თქმით, საგამოძიებო სამსახურის ქმედებების მიზანი მისი ძმის კომპანიის გაკოტრებაა, რის შემდეგაც შესაძლოა ათასობით ადამიანი გაზის გარეშე დარჩეს.

საგამოძიებო სამსახურმის ინფორმაციით კი, მკოიანის ძმის კომპანიიდან განჩინების საფუძველზე მხოლოდ შესაბამისი დოკუმენტაცია ამოიღო და არა კომპიუტერული ტექნიკა. მათივე თქმით, არ გატარებულა არც სხვა სახის საპროცესო იძულების ღონისძიება, რაც ხელს შეუშლის კომპანიას, განაგრძოს საქმიანობა და მოსახლეობის გაზით მომარაგება.

"აღვნიშნავთ, რომ ხსენებული საგამოძიებო მოქმედების დასრულების შემდეგ, კომპანიის ერთ-ერთმა ხელმძღვანელმა თავადვე დაადასტურა ოქმი ხელმოწერით, რომ დოკუმენტების ამოღება არ შეაფერხებს კომპანიის საქმიანობას", — აცხადებენ საგამოძიებო სამსახურში.

საგამოძიებო სამსახურის ინფორმაციით, გამოძიება სამცხე-ჯავახეთის რეგიონში მოქმედი ერთ-ერთი გაზის კომპანიის მიმართ სისხლის სამართლის კოდექსის 180-ე და 218-ე მუხლების პირველი ნაწილებით დაიწყო, რაც მართლსაწინააღმდეგო მისაკუთრების მიზნით სხვისი ნივთის დაუფლებას მოტყუებით და დიდი ოდენობით გადასახადისათვის განზრახ თავის არიდებას გულისხმობს.