ევროპული საქართველოს ლიდერმა, დავით ბაქრაძემ განაცხადა, ევროპული საქართველოს მთავარი მიზანი არა პოლიტიკის კონკრეტულ პიროვნებაზე მორგება, არამედ ქვეყანაში გარდამტეხი ცვლილებების მოტანაა.

"ჩვენს გუნდში არის მინიმუმ 4-5 ადამიანი, ვისაც შეუძლია იყოს პრემიერმინისტრი და ლიდერი, მაგრამ ჩვენი ამოსავალი წერტილი ის კი არ არის, რომ პიროვნებებს მოვარგოთ პოლიტიკა, ეს მეათასე ხარისხოვანია, ჩვენი მთავარი ამოცანაა, როგორ წავიყვანოთ ეს პროცესი ისე, რომ გარდამტეხი ცვლილებები მოვიტანოთ", — განაცხადა დავით ბაქრაძემ.

ბაქრაძემ აღნიშნა, რომ არჩევნების ამოცანა არა ცალკეული პოლიტიკოსის ბედის გადაწყვეტა, არამედ მოქალაქეების ცხოვრების გაუმჯობესება და მათთვის გარდამტეხი ცვლილებების მოტანაა.

"ჩვენი ამოცანაა, ქვეყანაში იყოს ქმედითი, კოალიციური მთავრობა, რომელიც მოიტანს გარდამტეხ ცვლილებებს, რომელიც გამოიყვანს ქვეყანას ეკონომიკური კრიზისიდან და წაიყვანს წინ", — განაცხადა ევროპული საქართველოს ლიდერმა.