რეგიონული განვითარებისა და ინფრასტრუქტურის მინისტრის ზურაბ ალავიძის თქმით, იანვრის დასაწყისიდან სამინისტროში ოპტიმიზაციის პროცესი შესაძლოა კადრების შემცირებით დასრულდეს. ამის შესახებ, მან დღეს, 25 დეკემბერს, კურორტ მიტარბის გახსნაზე სტუმრობისას, ჟურნალისტებთან საუბრისას განაცხადა:

"სამწუხაროდ, ზოგ ადამიანთან დამშვიდობება მოგვიწევს მაგრამ შესაბამისი, ღირსეული კომპენსაციებით გავაკეთებთ ამას. არაფერი განსაკუთრებული არ ხდება. ოპტიმიზაცია იმისთვის კეთდება, რომ ჩვენი გეგმების გამო დროში ვართ ძალიან შეზღუდულები. კარგი გაგებით, ამ კუთხით დრო ჩვენ წინააღმდეგ მუშაობს და ამიტომ ეს ყველაფერი რომ მოვასწროთ და გავაკეთოთ ხარისხიანად, ბიუჯეტში რაც გვაქვს დაგეგმილი, ამისთვის გვჭირდება სტრუქტურა ჩვენს გეგმებს მოერგოს".

სამინისტროებში ხარჯების შემცირების პროცესი მას შემდეგ დაიწყო, რაც მთავრობამ ბიუჯეტის ახალი გეგმა წარადგინა.