ღირსეული შრომის პლატფორმაში გაერთიანებული არასამთავრობო ორგანიზაციები და პროფაკავშირები საქართველოს პარლამენტს შრომის ინსპექციის რეფორმის დაუყოვნებლივ განხილვისა და ქვეყანაში ქმედითი შრომის ინსპექციის შექმნისკენ მოუწოდებენ. ისინი შრომის ინსპექციის რეფორმის გაჭიანურებაზე საუბრობენ, რომელსაც დასაქმებულები, პროფესიული კავშირები და უფლებადამცველი ორგანიზაციები წლებია ითხოვენ.

"შრომის ინსპექციის რეფორმის მიღება გაურკვეველი მიზეზით არის შეჩერებული. გვინდა, აღვნიშნოთ, რომ შემოთავაზებული ცვლილებებით შრომის ინსპექციის მანდატი არსებითად ძლიერდება, რაც მშრომელთა უფლებებისა და უსაფრთხოების სახელმწიფო ზედამხედველობას გააუმჯობესებს. დღესდღეობით, შრომის ინსპექციის შეზღუდული მანდატი ვერ ახდენს სამუშაო ადგილებზე დაშავებისა და გარდაცვალების შემთხვევების პრევენციასა და შრომითი უფლებების ჯეროვან დაცვას. გარდა ამისა, ინსპექციის შეკვეცილი უფლებამოსილება წინააღმდეგობაშია საქართველოს მიერ ნაკისრ საერთაშორისო ვალდებულებებთან", — აცხადებენ ორგანიზაციები.

სამოქალაქო სექტორში აღნიშნავენ, რომ მოქმედ პარლამენტს ოქტომბრის საპარლამენტო არჩევნებამდე სულ რამდენიმე პლენარული სხდომა აქვს დარჩენილი, ხოლო არჩევნებამდე საკანონმდებლო ცვლილებათა მიუღებლობა რეფორმის ფაქტობრივ ჩავარდნას ნიშნავს. NGO-ების შეფასებით, რეფორმის ჩავარდნა დასაქმებულებს უფლების დაცვის სათანადო მექანიზმების გარეშე დატოვებს დასაქმებულებს. ამასთანავე, საქართველოს საგარეო და საერთაშორისო სავაჭრო ურთიერთობებზე უარყოფითად იმოქმედებს.

განცხადების ხელმომწერი ორგანიზაციები არიან:

  • ღირსეული შრომის პლატფორმა;
  • ადამიანის უფლებების სწავლებისა და მონიტორინგის ცენტრი (EMC);
  • საქართველოს ახალგაზრდა იურისტთა ასოციაცია;
  • სოლიდარობის ქსელი;
  • საქართველოს სოციალურ მუშაკთა გაერთიანება;
  • საზოგადოებრივი მაუწყებლის პროფკავშირი;
  • ღია საზოგადოების ფონდი.

საქართველოს პარლამენტმა 2020 წლის გაზაფხულზე წარდგენილ შრომის ინსპექციის რეფორმას პირველი მოსმენით მხარი უკვე დაუჭირა. საკანონმდებლო ცვლილებები ჯანმრთელობის დაცვისა და სოციალურ საკითხთა კომიტეტმა არსებითად მოიწონა, თუმცა კანონპროექტის პლენარულ სხდომაზე მეორე მოსმენით განხილვა, ჯერჯერობით, არ მომხდარა.

ცვლილებით, შრომის ინსპექციას საშუალება მიეცემა, მონიტორინგი გაწიოს და რეაგირება ჰქონდეს შრომის უფლებების დარღვევაზე. შესაბამისად, გადაცდომებზე შეამოწმოს კერძო კომპანიები. საჭიროების შემთხვევაში, ცვლილებით გათვალისწინებულია სანქციების დაწესებაც. პროექტი პირველი მოსმენით ჯანდაცვის კომიტეტზე უკვე განიხილეს, თუმცა კენჭისყრა მომდევნო სხდომისთვის გადაიდო.

შრომის კოდექსი 2013 წელს შეიცვალა. 2015 წელს დაარსდა შრომის პირობების ინსპექტირების დეპარტამენტი. მათი ახალი მანდატი შრომის უსაფრთხოების საკითხებით შემოიფარგლებოდა და სამუშაო ადგილზე ინსპექტირებისთვის მას დამსაქმებლის წინასწარ თანხმობა სჭირდებოდა. შესაბამისად, რეკომენდაციებს სავალდებულო ძალა არ ჰქონდა. 2019 წლის თებერვალში მიღებულმა ცვლილებებმა, შრომის ინსპექციის უფლებამოსილება უსაფრთხოების ნაწილში გააფართოვა.