ადამიანის უფლებათა ცენტრის (HRIDC) ხელმძღვანელმა, ალეკო ცქიტიშვილმა განაცხადა, რომ ცენტრი თამარ ბაჩალიაშვილის საქმის მკვლელობის მუხლით გადაკვალიფიცირებას მოითხოვს. ბაჩალიაშვილის საქმეში ჩართვის შემდეგ, მათ პირველი კომენტარი დღეს, 9 სექტემბერს საგანგებო ბრიფინგის დროს გააკეთეს.

ცქიტიშვილმა აღნიშნა, რომ სატელიტის კადრებს, რომელიც მიხეილ რამიშვილმა გუშინ, 8 სექტემბერს გააცნო საზოგადოებას, ადამიანის უფლებათა ცენტრი სრულად ენდობა.

"დიახ, სატელიტიდან მოპოვებული ფოტოებით მტკიცდება, რომ იმ დღეებში იქ მანქანა არ იდგა. ეს არის ცალსახა მტკიცებულება იმისა, რომ დაკმაყოფილდეს ჩვენი მოთხოვნა, რომ საქმე უნდა გადაკვალიფიცირდეს მკვლელობის მუხლზე", — აღნიშნა ცქიტიშვილმა.

ცენტრის ხელმძღვანელმა ბრიფინგის დროს განაცხადა, რომ კითხვა სანდოობასთან დაკავშირებით კი არ უნდა დაისვას, არამედ იმაზე, თუ რატომ არ მოიპოვა ეს კადრები გამოძიებამ აქამდე.

ადამიანის უფლებათა ცენტრი თამარ ბაჩალიაშვილის საქმეში 7 სექტემბერს ჩაერთო. ცენტრის განცხადებით, მათი ჩართულობის მიზანია, ერთი მხრივ, სამართლებრივი დახმარება გაუწიოს დაზარალებულს, ხოლო მეორე მხრივ, თვალი მიადევნოს გამოძიების პროცესს.

23 წლის პროგრამისტი, თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ბაჩალიაშვილის საქმეზე გამოძიება 143-ე მუხლით დაიწყო, რაც თავისუფლების უკანონო აღკვეთას გულისხმობს, შემდეგ კი, 24 ივლისს გამოძიებას სისხლის სამართლის კოდექსის 115-ე მუხლი დაემატა, რაც თვითმკვლელობამდე მიყვანას ითვალისწინებს.