ჯანდაცვის მინისტრის, ეკატერინე ტიკარაძის განცხადებით, დღეიდან საქართველოში კოვიდინფიცირებულების მკურნალობა სასტუმროებში დაიწყება. მისი თქმით, მსგავსი დაწესებულებები თბილისში, ბათუმსა და ქუთაისში იფუნქციონირებს.

"ჩვენ განვსაზღვრეთ გუშინ კლინიკურ ჯგუფთან ერთად პროტოკოლი, რომლითაც იხელმძღვანელებენ ჩვენი ექიმები. ამ შემთხვევაში იქნება შემდეგი მიდგომა, 65 წლიდან ზევით პაციენტებს არ გადავიყვანთ სასტუმროებში და 18-დან 65 წლამდე ადამიანებს, რომლებსაც აქვთ დადასტურებული კოვიდინფექცია და ამავდროულად, არ აქვთ არანაირი თანმხლები დაავადება, შესაძლებლობა ექნებათ, უსიმპტომობის შემთხვევაში, მკურნალობა გაიარონ სასტუმროს ქსელში", — განაცხადა ტიკარაძემ.

ტიკარაძის თქმით, პირველ ეტაპზე გამოყოფილია სამი სასტუმრო, რომელიც აკმაყოფილებს არსებულ მოთხოვნებს. მისივე თქმით, ახლა კოვიდინფიცირებული პაციენტებისთვის აქვთ 600 საწოლი და დატვირთვა არის 65%, მაგრამ დატვირთვის გაზრდის შემთხვევაში, აქვთ რესურსი, რომ პაციენტები სასტუმროებში გადაიყვანონ.

როგორც მინისტრმა აღნიშნა, ბათუმში არსებული პაციენტების 15% უკვე გადაყავთ სასტუმროებში. მისივე თქმით, ეს პროცედურა თბილისშიც დაიწყება.