დღეს, 22 დეკემბერს, სინოდის სხდომის დაწყებამდე, ჭყონდიდის მიტროპოლიტმა მეუფე პეტრემ ჟურნალისტებთან საუბრისას საპატრიარქოში არსებულ პრობლემებზე ისაუბრა.

მან თქვა, რომ საპატრიარქოში არსებული ძირითადი პრობლემა არის პატრიარქის მდივარ-რეფერენტის შორენა თეთრუაშვილის "განუსაზღვრელი ძალაუფლება" და რომ თეთრუაშვილს ეკლესიაში "რუხი კარდინალის" პოზიცია აქვს. მეუფე პეტრეს თქმით, აღნიშნული საკითხი არის ერთ-ერთი, რომელსაც დღევანდელ სხდომაზე განიხილავენ:

"მთავარ პრობლემას უნდა შევეხოთ დღეს, ქალბატონის ხელში არსებული ძალაუფლებას, რასაც უკავშირდება არსებული პრობლემების შექმნა, ანუ უწესრიგო მდგომარეობა. მის ხელში არსებული ძალაუფლება არის ყველა სხვა პრობლემის თავი. ე.წ. რუხი კარდინალის მდგომარეობა და ე.წ. ჩრდილოვანი მმართველობა ეკლესიაში სამწუხაროდ აუცილებლად არის არსებული პრობლემების თავი. დანარჩენი ადვილად მოგვარებადია. როდესაც აღსდგება სამართლიანობა, ყველა მღვდელმთავარი და სინოდი თავის უფლება-მოვალეობებს შეასრულებს, აუცილებლად უნდა აღსდგეს საეკლესიო სასამართლო და ყველა ეს წვრილმანი მოგვარდება".

წმინდა სინოდის სხდომა საპატრიარქოშ ამ წუთებში მიმდინარეობს.