ტელეკომპანია პირველი ვიდეოკადრებს ავრცელებს, რომელიც მათი მტკიცებით, გლდანის ციხეშია გადაღებული და მასზე გიორგი შაქარაშვილის მკვლელობაში ბრალდებულები არიან ასახული. როგორც ჟურნალისტი ნოდარ მელაძე ამბობს, სხვადასხვა საკანში ჩამონტაჟებული იყო ფარული ვიდეოკამარები და ჩანაწერები ანონიმურმა წყარომ მიაწოდა.

ერთ-ერთი ვიდეო, TV პირველის მტკიცებით, ბრალდებულ ნიკოლოზ რევაზიშვილის საკანშია გადაღებული. აღნიშნულ ვიდეოში ისმის, რომ ერთ-ერთი პირი, სავარაუდოდ, თვითონ რევაზიშვილი ამბობს, რომ სურს იპოვოს ადამიანები, რომლებიც დაემუქრებიან მისი ყოფილი თანასაკნელის, კობა ჩიტიძის ოჯახს. ამასთან, მასთან ერთად საკანში მყოფი პირი ამბობს, რომ მსგავსი შურისძიება არასწორი იქნება.

როგორც ტელეკომპანია ამბობს, კობა ჩიტიძე ოჯახში ძალადობისთვისაა ბრალდებული. როგორც ჩიტიძემ გამოძიებას მოუყვა, რევაზიშვილმა საკანში მას გიორგი შაქარაშვილის მკვლელობა აღუწერა.

მეორე ვიდეოჩანაწერი გაკეთებულია არასრულწლოვანი ზ.ხ.-ს კამერაში. როგორც აუდიოჩანაწერში ისმის, სავარაუდოდ ზ.ხ. ამბობს, რომ თუ მას გამამტყუნებელი განაჩენი გამოუტანეს, მამამისი შურს იძიებს.

კიდევ ერთ ვიდეოჩანაწერში, ტელეკომპანიის ინფორმაციით, კვლავ ზ.ხ. საუბრობს. სავარაუდოდ, ზ.ხ. ამბობს, რომ ვერ ხვდება ტოიტა ქამრის მეექვსე მგზავრს, ვასილ მახარაძეს ბრალი რატომ არ დაუმძიმეს. მისივე თქმით, ის და მახარაძე იმ ღამით ერთნაირად იქცეოდნენ, თუმცა ბრალი მხოლოდ მას დაუმძიმეს.

"შენ ძმობას გეფიცები, თუ არ მეყვირა, შეეშვით წამოდით მეთქი, მაგრამ არ წამოვიდნენ", — ისმის ვიდეოში, თუმცა დაუდგენელია ვინ ამბობს ამას და ზუსტად რას გულისხმობს, მაგრამ სავარაუდოდ, გიორგი შაქარაშვილი იგულისხმება.

მეოთხე ვიდეოჩანაწერი კიდევ ერთი ბრალდებულის საკანშია გადაღებული, თუმცა TV პირველი არ ამბობს, ვინ საუბრობს ვიდეოში. იქ ერთ-ერთი პირი ახსენებს ანა გაბაჩევას. მისი თქმით, გაბეჩავა შეხვდა დაბადების დღის მონაწილეებს და სთხოვა ფულის შეგროვება, რადგან პანდემიის დროს წვეულების მოწყობისთვის აჯარიმებდნენ.

როგორც ტელეკომპანია ამბობს, მათ კიდევ აქვთ ვიდეოჩანაწერები და კვლავ აპირებენ გასაჯაროებას.

აღნიშნულ ჩანაწერებზე On.ge დაუკავშირდა სპეციალურ პენიტენციურ სამსახურს. უწყებაში განაცხადეს, რომ ეს არაა მათ მიერ გადაღებული კადრები, რადგან ისინი მხოლოდ ვიდეოთვალთვალს ახორციელებენ და კანონის შესაბამისად, ხმას არ იწერენ. ამასთან, ვიდეოკონტროლი ყველა საკანში არ მიმდინარეობს. როგორც პენიტენციურში განმარტავენ, სავარაუდოდ, ვიდეოები პროკურატურის მიერ სასამართლო განჩინების საფუძველზე საქმის გახსნის მიზნით არის მოპოვებული.

On.ge პროკურატურასაც დაუკავშირდა და მათ პასუხს მიღებისთანავე შემოგთავაზებთ.