ადვოკატები აპირებენ, რომ დღეს თბილისის საქალაქო სასამართლოში დააყენონ ცენტრ პოინტის დამფუძნებლის, მაია რჩეულიშვილის წინასწარი პატიმრობიდან გათავისუფლების საკითხი. ადვოკატმა მარინე ცუცქირიძემ ტელეკომპანია იმედს განუცხადა, რომ ამის მიზეზი რჩეულიშვილის ჯანმრთელობის გაუარესებაა:

"მისი მდგომარეობა არის ძალიან მძიმე, მას არ შეუძლია დამოუკიდებლად გადაადგილება, დამოუკიდებლად საკვების მიღება, ყოველივე ეს გვაძლევს იმის საფუძვლიან ვარაუდს, რომ სასამართლო ამ ყველაფერს გაითვალისწინებს, პროკურატურაც იქნება კეთილგონიერი და ასეთ მდგომარეობაში მაია რჩეულიშვილს არ დააბრუნებენ სასჯელაღსრულების დაწესებულებაში და შეუცვლიან მას აღვეთის ღონისძიებას. წინააღმდეგ შემთხვევაში, ეს შეიძლება მისთვის იყოს სასიკვდილო განაჩენი".

ცენტრ პოინტის დამფუძნებელს თბილისის საქალაქო სასამართლომ რამდენიმე თვის წინ აღკვეთის ღონისძიების სახით პატიმრობა შეუფარდა. პროკურატურა რჩეულიშვილს თანხის გაფლანგვას ედავება. სასამართლოს ჯერ განაჩენი არ გამოუტანია.