სამოქალაქო პლატფორმა არა ფობიას! პატრიოტთა ალიანსის ქსენოფობიური რიტორიკის გამო შეშფოთებას გამოთქვამს და მიიჩნევს, რომ პარტიის საქმიანობა ეთნიკური შუღლის გაღვივების ნიშნებს შეიცავს.

პლატფორმა პატრიოტთა ალიანსის ფეისბუქისგვერდზე გავცელებულ ვიდეორეკლამებთან დაკავშირებით აცხადებს, რომ ვიდეოებში ასახული ინფორმაცია დამახინჯებული ფორმით წარმოაჩენს საქართველოს ამჟამინდელ რეალობასა და ისტორიას. მათი თქმით, აღნიშნული ვიდეომასალა მიზნად ისახავს საზოგადეობაში თურქეთის საწინააღმდეგო განწყობების შექმნასა და სიძულვილის გაღვივებას.

სამოქალაქო პლატფორმა აცხადებს, რომ აჭარაში განთავსებული ბანერიც, სადაც აჭარა ოკუპირებულ ტერიტორიებთან ერთად წითლად იყო მონიშნული, ამავე მიზანს ემსახურება.

სამოქალაქო მოძრაობა არა ფობიას! ცენტრალურ საარჩევნო კომისიას მოუწოდებს შეისწავლოს პატრიოტთა ალიანსის წინასაარჩევნო კამპანიისას გამოყენებული სააგიტაციო მასალა და გაატაროს საქართველოს კანონმდებლობით გათვალისწინებული ზომები. ასევე, ისინი მოუწოდებენ პოლიტიკურ პარტიებს, რომ პატივი სცენ დემოკრატიულ ღირებულებებს და წინასაარჩევნო კამპანია თანასწორობის პრინციპზე დაყრდნობით განახორციელონ.

29 აგვისტოს ინტერნეტსივრცეში გავრცელდა ფოტოები, სადაც ჩანდა პარტია პატრიოტთა ალიანსის ბანერი. ბანერზე საქართველოს რუკაზე აჭარის რეგიონი გამოყოფილია, როგორც ოკუპირებული ტერიტორია, აფხაზეთთან და სამხრეთ ოსეთთან ერთად. აღნიშნულს სოციალურ ქსელში კრიტიკა მოჰყვა, პატრიოტთა ალიანსს შუღლის გაღვივებაში ადანაშაულებდნენ.

მწვავე კრიტიკის შემდეგ პარტიის ლიდერმა, ირმა ინაშვილმა განაცხადა, რომ მისი ბანერი "არასწორად შეფერადებულ მდგომარეობაში" გიგა ბოკერიას და მიხეილ სააკაშვილის დავალებით, მის პარტიაში მყოფმა, მოსყიდულმა პირებმა გააკრეს. ინაშვილის მტკიცებით, მათ ბანერზე აჭარა არა ოკუპირებული რეგიონების ფერებში, არამედ ყვითლად იყო გამოყოფილი და SOS ეწერა.