შინაგან საქმეთა სამინისტროს ცნობით, შუახევში მანქანა ხევში, დაახლოებით, 100 მეტრის სიმაღლიდან გადავარდა, 3 ადამიანი გარდაიცვალა, 2 კი დაშავდა.

უწყების ინფორმაციით, აჭარაში, შუახევის მუნიციპალიტეტში, სოფელ ხაბელაშვილებთან მომხდარი ავარიის შედეგად გარდაცვლილთა შორის 2 პირი შინაგან საქმეთა სამინისტროს საგანგებო სიტუაციების მართვის სამსახურის თანამშრომლები არიან.

შსს-ს განცხადებით, დაშავებულები მაშველებმა უსაფრთხო ადგილზე მალევე გამოიყვანეს, ხოლო სასწრაფო სამედიცინო დახმარების ჯგუფებმა ისინი სამკურნალო დაწესებულებაში გადაიყვანეს. ამ დროისთვის არსებული ინფორმაციით, მათ სიცოცხლეს საფრთხე აღარ ემუქრება.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.