დაავადებათა კონტროლის ცენტრის ხელმძღვანელის მოადგილე, პაატა იმნაძე ლუგარის ლაბორატორიაზე განხორციელებულ კიბერშეტევაზე ამბობს, რომ გარედან თავდასხმებს მიჩვეულია, ამიტომ მას ქვეყნის შიგნით რომ უტევენ, ეს უფრო აწუხებს.

"გარედანაც და შიგნიდანაც ერთნაირად გვიტევენ და მიჩვეულები ვართ. ჩვენ მაგისთვის არ გვცალია, კოვიდს ვებრძვით", — განაცხადა იმნაძემ რუსთავი 2-ის ეთერში.

პაატა იმნაძე ასევე, აღნიშნავს, რომ რომ მას ლუგარის ლაბორატორიაზე კიბერთავდასხმის არ ეშინია, რადგან "იქ არაფერი საიდუმლო ექსპერიმენტები" მათ არ ჰქონდათ, ამიტომ ისინი "ვერაფერს მოიპარავდნენ".

დღეს, 3 სექტემბერს საქართველოს შინაგან საქმეთა სამინისტრომ გაავრცელა ინფორმაცია, რომ ჯანდაცვის სამინისტროს კომპიუტერულ სისტემაზე უცხო ქვეყნის სპეცსამსახურების მიერ კიბერშეტევა განხორციელდა. უწყებაში აღნიშნეს, რომ მართლსაწინააღმდეგოდ დაეუფლნენ ლუგარის ლაბორატორიის მონაცემებსაც, რაც ამ დროისთვის ერთ-ერთ უცხოურ ვებ-გვერდზე ხელმისაწვდომია. შსს არ აკონკრეტებს, რომელი ქვეყნის სპეცსამსახურებზე საუბრობს.