საქართველოს ახალგაზრდა იურისტთა ასოციაცია მიიჩნევს, რომ მოქალაქეების ნაწილისთვის სამხედრო ჰოსპიტალის დავალიანების ჩამოწერა წინასაარჩევნოდ მოქალაქეთა მძიმე სოციალური პირობებით მანიპულაცია და ადმინისტრაციული რესურსის გამოყენებაა. საია მოქალაქეების მძიმე სოციალური პირობების საარჩევნო მიზნით გამოყენებას მიუღებელს უწოდებს.

ორგანიზაციაში აცხადებენ, რომ ხელისუფლების ინიციატივა შეუმსუბუქოს მოქალაქეებს ფინანსური წნეხი მისასალმებელია, თუმცა არჩევნების წინ ამ ნაბიჯის გადადგმა ამომრჩეველთა გულის მოგებაზე გათვლილი მანიპულაციის შთაბეჭდილებას ტოვებს. მათივე თქმით, თავდაცვის მინისტრს ამის გაკეთება კენჭისყრის დღის შემდეგაც შეეძლო.

"აღსანიშნავია, რომ ამ ინიციატივის გასაჯაროების დრო, წინასაარჩევნო კამპანიის ოფიციალურად დაწყების წინა დღეა. ეს კიდევ ერთი მანიპულაციაა. ხელისუფლებამ ამით თავი აარიდა იმ რეგულაციებს, რომელიც მას ამ დროს ადმინისტრაციული რესურსი გამოყენებას უკრძალავს", — აცხადებენ საიაში.

თავდაცვის სამინისტრომ 31 აგვისტოს განაცხადა, რომ იმ მოქალაქეებს, რომლებსაც 2009 წლიდან სამხედრო ჰოსპიტალის მიმართ ხანდაზმული დავალიანება, სამი წელი და მეტი ვადით, ერიცხებათ, ჩამოეწერებათ. უწყების ცნობით, საუბარია 1 მლნ 600 ათასი ლარის ოდენობის თანხაზე. მათივე ინფორმაციით, მოქალაქეების რაოდენობა, რომლებსაც დავალიანება ერიცხებათ, ათასამდე ადამიანს ერიცხება.