ევროპული საქართველოს საარჩევნო შტაბის ხელმძღვანელი სერგი კაპანაძე ოპოზიციური პარტიების მაჟორიტარ კანდიდატებზე და კოალიციური მთავრობის პრემიერობის კანდიდატის თემას ეხმაურება.

სერგი კაპანაძის თქმით, სწორედ მათი ინიციატივა იყო საერთო ოპოზიციური კანდიდატების დაყენება რეგიონებში, თუმცა ეს არ მოხდა და ეს გვერდი გადაიფურცლა. კაპანაძემ აღნიშნა, რომ ევროპულ საქართველოს ყველა რეგიონში ჰყავს ძლიერი კანდიდატები, რომლებიც იბრძოლებენ გამარჯვებისათვის.

სერგი კაპანაძემ ასევე პრემიერობის სავარაუდო კანდიდატზე გააკეთა განცხადება. მისი თქმით, ყველა პარტიას შეუძლია დააყენოს კანდიდატი, თუმცა არჩევნებისა და ბიძინა ივანიშვილის დამარცხების შემდეგ, ყველა პარტიას მოუწევს კომპრომისულ კანდიდატზე შეთანხმება. სერგი კაპანაძემ აღნიშნა, რომ სწორედ ევროპულ საქართველოს იქნება ცენტრალური როლი კოალიციაში, რადგან მათ აქვთ კონკრეტული გეგმა და სწორედ ევროპული საქართველოა კომპასი გარდამტეხი ცვლილებებისთვის.

"ევროპული საქართველოს ამოცანაა, რომ ამ ქვეყანაში მოხდეს ცვლილებები და ეს ხელისუფლება, რომელიც არასწორი მიმართულებით მიაქანებს ქვეყანას, იყოს შეცვლილი. ჩვენ ყველაფერი ვცადეთ იმისათის, რომ რეგიონებში ყოფილიყო გამსხვილებული მაჟორიტარული კანდიდატები, თუმცა კონკრეტული პარტიის გამო ეს არ მოხდა და ჩვენ უკან აღარ დავბრუნდებით. ჩვენ ყველგან დავაყენეთ ჩვენი, ძალიან ძლიერი კანდიდატები, რომელთაც კონკრეტული ხედვა გააჩნიათ, თუ როგორ უნდა შეიცვალოს ეკონომიკა, რეგიონების ცხოვრება უკეთესობისაკენ, და ჩვენ ვიქნებით კომპასი ამ გარდამტეხი ცვლილებების და ეს მაჟორიტარები იქნებიან ძლიერი კანდიდატები, რომლებიც იბრძოლებენ გამარჯვებისათვის, ან მეორე ტურში გასვლისთვის.

რაც შეეხება პრემიერობის კანდიდატებს, ყველა პოლიტიკურ პარტიას ეყოლება თავისი კანდიდატი, ხოლო საბოლოოდ არჩევნებისა და ბიძინა ივანიშვილის დამარცხების შემდეგ, უნდა შეირჩეს ის კანდიდატი, რომელიც იქნება კომპრომისული ყველასათვის. კოალიციურ მთავრობაში, ევროპულ საქართველოს ექნება ცენტრალური როლი, რადგან სწორედ ჩვენ გვაქვს კონკრეტული გეგმა და ვართ კომპასი, თუ როგორ უნდა მოხდეს გარდამტეხი ცვლილებები", — განაცხადა სერგი კაპანაძემ.