ტექნოლოგიების ყველაზე მდიდარი მეფის ტიტულისთვის ბრძოლა გამწვავდა.

ორშაბათს, 31 აგვისტოს, აქციების განაწილების შემდეგ Tesla-ს აქციების ფასის ზრდის დამსახურებით კომპანიის CEO ილონ მასკი ახლა მსოფლიოში მესამე ყველაზე მდიდარი ადამიანია.

მასკს ახლა $115,4 მილიარდი აქვს. წარმოუდგენელია, მაგრამ მხოლოდ ამ წელს მისი ქონება $87,8 მილიარდით გაიზარდა, რადგან ტესლას აქციების ფასმა დაახლოებით ხუთჯერ მოიმატა.

ამგვარად, მასკმა Facebook-ის CEO-ს, მარკ ცუკერბერგს გადაუსწრო, რომელიც ახლა გაბრაზებული ქვას ჭამს (ნუ, ვხუმრობთ. ალბათ, სადმე თავის პირად კუნძულზეა და სახეზე ჭარბად უსვია მზისგან დამცავი კრემი), რადგან მას სულ რაღაც $110,8 მილიარდი აქვს.

მასკზე უფრო მდიდარი ტექნოლოგიების მხოლოდ ორი მაგნატია: ბილ გეიტსი, რომლის ქონებაც დაახლოებით $125 მილიარდი ღირს, და ჯეფ ბეზოსი, რომლის ქონების ფასიც $202 მილიარდს აღწევს. იმას თუ გავითვალისწინებთ, მასკი რეიტინგში რამდენად სწრაფად მიიწევს წინ — სხვა თუ არაფერი, ის მეხუთედან მეოთხე ადგილზე მხოლოდ ორი კვირის წინ გადავიდა — გასაკვირი არ იქნება, თუ ის მალევე დაეწევა გეიტსს.