პარლამენტის თავმჯდომარის მოადგილე, მამუკა მდინარაძე დოსიეს პატრიოტთა ალიანსზე გამოქვეყნებულ დოკუმენტებთან დაკავშირებით აცხადებს, რომ ელემენტარული მტკიცებულების არსებობის შემთხვევაში ამაზე სახელმწიფო რეაგირებას მოახდენდა. მანვე აღნიშნა, რომ მხოლოდ გამოქვეყნებული სტატია გამოძიების დასაწყებად საკმარისი არ არის.

"უბრალოდ ხშირად ისმის სპეკულაციური შეკითხვები, გამოქვეყნდა სტატია... სტატია იბეჭდება დღეში ათი ათასობით და ასი ათასობით. აქეთ დაგვდებენ რაღაცაში ბრალს მარტო სტატიაზე, ჟურნალისტის რაღაც განცხადებაზე, მის წარმოდგენაზე, რომ გამოძიება დაიწყოს. ამაში იქეთ დაგვდებენ ბრალს და შეიძლება მართლებიც იყვნენ ის ადამიანები, რომლებიც ქვეყანასთან არ არიან მართლები", — განაცხადა მდინარაძემ ქართული ოცნების ბრიფინგზე.

24 აგვისტოს ცენტრ დოსიეს განკარგულებაში აღმოჩნდა სამუშაო დოკუმენტები, ანალიტიკური ანგარიშები, ფინანსური შეფასებები, წინასაარჩევნო მეთოდები და საოპერაციო მოხსენებები დაზვერვის გენერალ ჩერნოვის სამდივნოდან. მათი განცხადებით, ამ დოკუმენტებით ირკვევა, რომ რუსეთი საქართველოს არჩევნებში ჩარევასა და შედეგებზე გავლენის მოხდენას ცდილობს და სასურველი შედეგის მისაღწევად პატრიოტთა ალიანსს აფინანსებს, რომელიც ანტიდასავლური და პრორუსული რიტორიკით გამოირჩევა.

31 აგვისტოს კი პატრიოტთა ალიანსის რუსეთთან კავშირების შესახებ ცენტრმა დოსიემ ახალი მასალები გამოაქვეყნა, რომლებშიც ასახულია რუსული "კონტრარგუმენტები", ალიანსის ლიდერების ოკუპირებულ რეგიონში ვიზიტის გასამართლებლად.