საქართველოს საპატრიარქოს პრესცენტრის ხელმძღვანელი ანდრია ჯაღმაიძე აცხადებს, რომ მეუფე გიორგის პოზიციაში სიხისტე ნამდვილად ჩანდა, მაგრამ მისი განცხადება მთლიანობაში უნდა განხილულიყო. ჯაღმაიძის თქმით, მეუფე გიორგის განცხადებაში ჩანდა, რომ მან დაავალა მღვდელმსახურს გარემოებების შესწავლა, რაც ნიშნავდა იმას, რომ მას არ ჰქონდა საბოლოოდ ჩამოყალიბებული პოზიცია.

"ეს დავალება მის კატეგორიულ ტონს ერთგვარად არბილებდა და ტოვებდა იმის შესაძლებლობას, რომ გარემოებების გათვალისწინებით, მომხდარიყო წესის აგება. თუმცა, კი, ჩანდა იქ ძალიან ხისტი პოზიციაც, მაგრამ მთლიანობაში უნდა განვიხილოთ ეს განცხადება და ჩვენ ვნახავთ, რომ მან იზრუნა იმაზე, რომ მღვდელმსახურს შეესწავლა გარემოებები", — განაცხადა ჯაღმაიძემ ტვ პირველთან საუბრის დროს.

ჯაღმაიძე ამბობს იმასაც, რომ ასაკიდან და გარემოებებიდან გამომდინარე, საპატრიარქომ დასაშვებად მიიჩნია წესის აგება.

"დიდი ინტერესი და აზრთა სხვადასხვაობა გამოიწვია ამ ახალგაზრდას ტრაგიკულმა აღსასრულმა. ბევრი სპეკულაციები გაკეთდა დღის განმავლობაში წესის აგებასთან დაკავშირებით, საპატრიარქომ გაავრცელა განცხადება, რომ მისი ასაკიდან და გარემოებებიდან გამომდინარე ჩვენ მიგვაჩნია დასაშვებად, რომ წესის აგება მოხდეს. როცა ასეთი საორჭოფო ვითარებაა, თუკი არ დგინდება მიზანმიმართული ხელყოფა საკუთარი სიცოცხლისა, თუკი ეკლესიას ეძლევა საშუალება წესის აგების დაშვებისა, ყოველთვის ამ მხარეს ვიხრებით. ახლა, მიზანშეწონილად მიგვაჩნია წესის აგება", — ამბობს ის.

ტყიბულისა და თერჯოლის მიტროპოლიტი, მეუფე გიორგი (შალამბერიძე) ამბობს, რომ თერჯოლაში დაღუპულ 11 წლის მოზარდს წესს ვერ აუგებენ, რადგან ამის უფლება არ აქვთ. მისი აზრით, ეს "ღვთის გმობაა". ამის შესახებ მან რუსთავი 2-თან სატელეფონო ინტერვიუში განაცხადა.

საპატრიარქოს თხოვნით მიმართავს დაღუპული ბავშვის ბებია და ამბობს, რომ ბავშვი მორწმუნე იყო და შეიძლება თავი არც მოუკლავს. ის იმედოვნებს, რომ საპატრიარქო გამონაკლისს დაუშვებს.

11 წლის მოზარდის თვითმკვლელობამდე მიყვანის მცდელობით მამაა დაკავებული. ოჯახის წევრები ვარაუდობენ, რომ მამამ ბავშვი ცემისას მოკლა და თვითმკვლელობის ინსცენირება სცადა.

წესის აგების საკითხი სასულიერო პირებმა პრობლემად აქციეს ლუკა სირაძის შემთხვევაში. ისინი ამბობდნენ, რომ გარდაცვლილ 11 წლის ბავშვს წესს ვერ აუგებდნენ, რადგან თვითმკვლელობის შემთხვევაში ამას რელიგიური წესი არ ითვალისწინებს. მოგვიანებით მათ განაცხადეს, რომ პატრიარქის კურთხევით ლუკა სირაძეს წესს აუგებდნენ.