"ვისაც არც ნუგეშისცემა შეუძლია და არც მონანიება, საინტერესოა რას ემსახურება ასეთი დაწესებულება?" — ასე ეხმაურება ევანგელურ-ბაპტისტური ეკლესიის ეპისკოპოსი, რუსუდან გოცირიძე ტყიბულისა და თერჯოლის მიტროპოლიტის, მეუფე გიორგის (შალამბერიძე) გადაწყვეტილებას, რომ თერჯოლაში დაღუპულ 11 წლის მოზარდს წესს არ აუგებს. მისი განცხადებით, წესის აგება ჭირისუფლების ნუგეშისცემაა.

"არც ერთი რანგის სასულიერო პირს არ ხელეწიფება საიქიო საქმეებში ჩარევა. მით უფრო ვინმეს სამოთხეში, ან ჯოჯოხეთში გადამისამართება... ამის შესახებ ვერსად ნახავთ ვერც ძველ და, ვერც ახალ აღთქმაში...

წესის აგება არის ჭირისუფლების ნუგეშისცემა და როცა პატარა ბავშვის სიკვდილზეა ლაპარაკი ძალადობის გამო, უნდა ერიცა და ბერიც წესს უგებდეს კი არა და ღვთის წინაშე პატიებას ითხოვდეს თავისი წილი დანაშაულისათვის", — წერს გოცირიძე.

ტყიბულისა და თერჯოლის მიტროპოლიტი, მეუფე გიორგი (შალამბერიძე) კი ამბობს, რომ თერჯოლაში დაღუპულ 11 წლის მოზარდს წესს ვერ აუგებენ, რადგან ამის უფლება არ აქვთ. მისი აზრით, ეს "ღვთის გმობაა". ამის შესახებ მან რუსთავი 2-თან სატელეფონო ინტერვიუში განაცხადა.