პარტია მოქალაქის ლიდერი ალეკო ელისაშვილი ამბობს, რომ საარჩევნო ხმების დასაცავად რეალური ბრძოლაა საჭირო და არა დეკლარაციების ხელმოწერა. ამის შესახებ მან რუსთავი 2-ის ეთერში ისაუბრა.

მისივე თქმით, ეს არ არის ის საკითხი, რომელზეც იმ ადამიანებთან განიხილავდა, რომელიც მათთვის მიუღებელია.

"დაველაპარაკებით დანარჩენ პარტიებს იმ შემთხვევაში, თუ კი დავინახავთ ამის სახელმწიფოებრივ მნიშვნელობას. ასეთად ჩვენ მიგვაჩნდა პროპორციული არჩევნების საკითხი, ამიტომ ველაპარაკებოდით სხვებს, აბსოლუტურად ჩვენთვის მიუღებელ ხალხს. მაგრამ ბასტი-ბუბუ რაღაცებში მონაწილეობას არ ვაპირებთ, რა. ხმის დასაცავად უნდა იბრძოლო, დეკლარაციას კი არ უნდა მოაწერო ხელი", — თქვა ელისაშვილმა.

24 აგვისტოს საარჩევნო ხმების დაცვის მიზნით, ოპოზიციურმა პარტიებმა მემორანდუმს მოაწერეს ხელი. ოპოზიციაში აცხადებენ, რომ კოორდინირებულად იმუშავებენ ყველა ოლქში, მათ შორის იქაც, სადაც ერთმანეთს კონკურენტი დაუყენეს.

მათივე განცხადებით, ერთობლივად და შეთანხმებულად იმუშავებენ საერთაშორისო დამკვირვებლებთან, რათა არჩევნების ლეგიტიმურობის გარშემო არ გაჩნდეს კითხვის ნიშნები.