მთავარი პროკურატურა ტელეკომპანია იბერიას ჟურნალისტის ცემის საქმეზე განცხადებას ავრცელებს, სადაც წერია, რომ საქმის კვალიფიკაციას დაემატა საქართველოს სისხლის სამართლის კოდექსის 333-ე მუხლის მე-3 ნაწილის ბ ქვეპუნქტი, რაც გულისხმობს სამსახურებრივი უფლებამოსილების გადამეტებას სახელმწიფო-პოლიტიკური თანამდებობის მქონე პირის მიერ, ძალადობით ან იარაღის გამოყენებით.

დანაშაული ისჯება ჯარიმით ან თავისუფლების აღკვეთით ვადით სამიდან ხუთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.

პროკურატურის ცნობით, საქმეზე მიმდინარეობს საპროცესო და საგამოძიებო მოქმედებები, იკითხებიან მოწმეები, მიმდინარეობს შემთხვევის ადგილის დათვალიერება, დანიშნულია და ტარდება სასამართლო-სამედიცინო ექსპერტიზა.

თავდაპირველად, გამოძიება საქართველოს სისხლის სამართლის კოდექსის 126-ე მუხლის პირველი ნაწილით დაიწყო, რაც გულისხმობს ძალადობას.

ტელეკომპანია იბერიას ჟურნალისტი გიორგი გასვიანი ბორჯომის პოლიციის სამმართველოს თანამშრომელს მიშა ხუციშვილს და მის მეგობრებს ფიზიკურ ძალადობაში ადანაშაულებს.