პროკურატურამ თანხის მოტყუებით, ჯგუფურად დაუფლებისა და მითვისების საქმეზე 4 პირს ბრალდება წარუდგინა.

უწყების ინფორმაციით, სამშენებლო კომპანია დელუქს ისნის დამფუძნებელმა და კიდევ ორმა დაკავებულმა პირველი რიგის იპოთეკით დატვირთული უძრავი ნივთის განვადებით ნასყიდობის ხელშეკრულებები გააფორმეს მოქალაქეებთან. ამასთანავე, მათი ინფორმაციით, მეტი ფინანსური სარგებლის მიღების მიზნით 2018 წლის ოქტომბრიდან უძრავი ქონება მეორე რიგის იპოთეკით დატვირთეს, შემდეგ კი მეორე რიგის იპოთეკარებთან გაფორმებული სესხისა და იპოთეკის ხელშეკრულების ვადები დაარღვიეს. ამის შემდეგ სამშენებლო კომპანიის დამფუძნებელმა პასუხისმგებლობისგან თავის არიდების მიზნით, კომპანია შპს დელუქს ისანი სხვაზე გაასხვისა.

პროკურატურის ცნობით, კომპანიის ახალმა დირექტორმა მინდობილობა გააფორმა პირთან, რომელიც რამდენიმე თვის განმავლობაში სხვადასხვა მოქალაქესთან უძრავი ქონების ნასყიდობის ხელშეკრულებებს აფორმებდა. ის ერთი და იმავე ბინებს ასხვისებდა, ზოგიერთ სართულზე კი იმაზე მეტ ბინას ყიდდა, ვიდრე რეალურად კომპანიას გააჩნდა. ამ გზით მოქალაქეთა კუთვნილ დიდი ოდენობით ფულად თანხებს მოტყუებით დაეუფლა, კომპანიის დირექტორმა კი სამსახურებრივი მდგომარეობის გამოყენებით, მართლსაწინააღმდეგოდ საზოგადოების კუთვნილი 336 820 ლარი მიითვისა.

პროკურატურა დაკავებულებს თაღლითობას და სხვისი ქონების მართლსაწინააღმდეგო მითვისებას ედავება.