საქართველოში საარჩევნო პლაკატების გაკვრის გამო სამი პარტია დააჯარიმეს. სამივე მათგანის თქმით, ეს პოლიციის მხრიდან კონსტიტუციისა და კანონის დაარღვევა, პოლიციის საქმე კი კრიმინალების დაჭერაა.

პირველი პარტია, რომელიც ამ მიზეზით დააჯარიმეს ევროპული საქართველოა. პარტიის აქტივისტები პლაკატებს იუსტიციის სამინისტროს მიმდებარე ტერიტორიაზე აკრავდნენ.

"რა დღეშია ეს პოლიცია, იმის მაგივრად, რომ ებრძოლონ კრიმინალს, მოდიან და აჯარიმებენ პატარა ბავშვებს. ამ ქმედებით ისინი არღვევენ კონსტიტუციასა და კანონს", — განაცხადა ევროპული საქართველოს ერთ-ერთმა ლიდერმა, გიგი უგულავამ.

როგორც On.ge-ს პარტიაში უთხრეს, მათ ქალაქ თბილისის მუნიციპალიტეტის მერიის ზედამხედველობის საქალაქო სამსახურმა ჯარიმის მიზეზად ქალაქის იერსახის დამახინჯება დაუსახელა. ევროპულ საქართველოში ამბობენ, რომ საჯარიმო ქვითარი არ ჩაიბარეს.

მეორე ჯარიმა სტრატეგია აღმაშენებლის აქტივისტს დაუწერეს. მოძრაობის ლიდერი გიორგი ვაშაძე, ამბობს რომ პოლიციისგან რეგირებას ითხოვს იმ პოლიციელზე, რომელმაც ჯარიმა დაუწერა მის აქტივისტს.

"ვადგენთ სამართალდარღვევის ოქმს და ვითხოვთ პოლიციისგან რეაგირებას კანონდამრღვევ პოლიციელზე, რომელიც "აკაჩავებდა" სრული ამ სიტყვის გაგებით, ქუჩაში მდგომ ადამიანს, რომელიც პლაკატებს აკრავდა. ამ ადამიანებისგან მოვითხოვთ კონკრეტულ რეაგირებას", — განაცხადა ვაშაძემ.

დაჯარიმებას ვერ გადაურჩა გირჩიც. პარტიის ერთ-ერთი წარმომადგენელი მირიან ბეჟიტაშვილი რუსთაველზე, სამშენებლო ღობეზე, გირჩის სტენსილის დახატვის გამო დააჯარიმეს. როგორც მირიანი On.ge-თან საუბარში აღნიშნავს, "კალაძის პოლიციის ჯარიმის გადახდას არ აპირებს".

“სამშენებლო ღობეზე ვაკეთებდი გირჩის სტენსილის, რა დროსაც კალაძის პოლიცია მოვიდა და 1 000 ლარით დამაჯარიმა. მიუხედავად იმისა, რომ არაერთხელ გამიკრავს მსგავსი გირჩის სტენსილი. ვფიქრობ რომ ეს ჯარიმა, არის უსამართლო და ემსახურება პოლიტიკური აქტივობების ხელის შეშლას", — განაცხადა ბეჟიტაშვილმა.

უწყებაში განმარტავენ, რომ მუნიციპალურ ინსპექციას კანონი არ დაურღვევია, რადგან პარტიებს საარჩევნო აგიტაციის დაწყება არჩევნებამდე ორი თვით ადრე შეუძლიათ. ისინი მიუთითებენ საარჩევნო კოდექსის 45-ე მუხლზე, სადაც წერია, რომ "წინასაარჩევნო კამპანია (აგიტაცია) იწყება კენჭისყრის დღემდე 60 დღით ადრე. პოლიტიკური პარტიები და საარჩევნო სუბიექტებს კანდიდატები სარგებლობენ თანასწორი უფლებებით და აკისრიათ თანაბარი ვალდებულებები ამ კანონით დადგენილი წესით".