ახალი ზელანდიის სასამართლომ ტერაქტში ბრალდებულ ბრენტონ ტარანტს შეწყალების უფლების გარეშე სიცოცხლის ბოლომდე პატიმრობა მიუსაჯა. ის გახდა პირველი ადამიანი, რომელსაც მსგავსი მკაცრი განაჩენი გამოუტანეს ახალ ზელანდიაში.

29 წლის ბრენტონ ტარანტი 2019 წლის 15 მარტს ქალაქ კრაისტჩერჩში, ორ მეჩეთში შევარდა ცეცხლი გახსნა, რის შედეგადაც 51 ადამიანი დაიღუპა. თავდასხმის დროს მას ფეისბუქზე პირდაპირი ეთერი ჰქონდა.

გარდა ამისა, მას ბრალად ედება 40 ადამიანის მკვლელობის მცდელობა და ტერორისტული აქტის განხორციელება. მან ყველა ბრალდება აღიარა.

როგორც BBC წერს, მოსამართლე კემერონ მანდერმა ტარანტის ქმედებას არაადამიანური უწოდა და დაამატა, რომ მის დანაშაულს ვერანაირი სასჯელი ვერ გამოისყიდის.

"რამდენადაც შემიძლია დავინახო, მსხვერპლებთან არანაირი თანაგრძნობა არ გაქვთ", — განაცხადა მოსამართლემ.

ტარანტმ, რომელიც სასამართლო სხდომას ესწრებოდა, უარი თქვა საბოლოო სიტყვაზე.

განაჩენის გამოცხადებამდე, მას დაღუპულთა ოჯახის წევრებმაც მიმართეს.

ახალი ზელანდიის პრემიერმინისტრმა, ჯასინდა არდერნმა კმაყოფილება გამოთქვა იმის გამო, რომ ბრალდებული სიცოცხლის ბოლომდე ციხეში იქნება.