საზოგადოებრივ მაუწყებელში ბომბის არსებობის შესახებ შესულ ზარზე გამოძიება ტერორიზმის შესახებ ცრუ შეტყობინების მუხლით დაიწყო. ამის შესახებ On.ge-ს შინაგან საქმეთა სამინისტროში განუცხადეს.

დღეს, 24 აგვისტოს საზოგადოებრივი მაუწყებლის შენობიდან ევაკუაცია განხორციელდა. მაუწყებლის ინფორმაციით, მიზეზი გახდა ცხელ ხაზზე შესული ზარი ბომბის არსებობის შესახებ.

საქმეზე გამოძიება სისხლის სამართლის კოდექსის 331-ე მუხლის პირველი ნაწილით მიმდინარეობს. ამ მუხლით გათვალისწინებული დანაშაული ისჯება ჯარიმით ან გამასწორებელი სამუშაოთი ვადით ერთიდან ორ წლამდე ანდა თავისუფლების აღკვეთით ვადით ორიდან ხუთ წლამდე.