ტელეკომპანია იმედია ცნობით, ქსნის #15 პენიტენციურ დაწესებულებაში პატრიარქის ვიზიტის გამო, მნახველების ვიზიტი და ამანათების გადაცემა შეფერხდა. ტელეკომპანიის ჟურნალისტს შეკითხვაზე, თუ რატომ გააბრუნეს უკან პატიმრების ახლობლები, რომელთაც ამანათის შეტანა სურდათ, სასჯელაღსრულების მინისტრმა უპასუხა, რომ პატიმრებისთვის ამანათზე მეტ სიკეთეს წარმოადგენს პატრიარქის მიერ ნაკურთხ ტაძარში ლოცვის საშუალება:

"ჩვენ იმაზე ვსაუბრობთ რომ 40 წუთის განმავლობაში შეფერხდა გამოტანა, ამაზე დიდ ბოდიშს ვიხდი, მაგრამ ვფიქრობ, რომ იმ პატიმრებისთვის რომლებიც დღეს იხდიან სასჯელს, ნახევარი საათით დაგვიანებულ ამანათზე მეტ სიკეთეს წარმოადგენს პატრიარქის მიერ ნაკურთხ ტაძარში ლოცვის საშუალება".

დღეს, ილია მეორემ წმინდა ნიკოლოზის სახელობის ტაძარი აკურთხა, რომელიც სამინისტროს თანამშრომლებისა და მსჯავრდებულთა მონაწილეობითა და შემოწირულობებით აშენდა.

საქართველოს მართლმადიდებელი ეკლესიის კათოლიკოს-პატრიარქმა N15 პენიტენციურ დაწესებულებაში მყოფი მსჯავრდებულები დალოცა და მათ წმინდა ნიკოლოზის ხატი, ასევე, საქართველოს ერისა და ეკლესიის ისტორიის ტრილოგია აჩუქა. გარდა ამისა, ილია მეორემ საპატრიარქოს სიგელები გადასცა 125 მსჯავრდებულს, რომლებიც წმინდა ნიკოლოზის ტაძრის მშენებლობაში მონაწილეობდნენ

სასჯელაღსრულებისა და პრობაციის მინისტრის განცხადებით, წმინდა ნიკოლოზის ტაძრის მშენებლობა დაწესებულებაში წელიწადი და 7 თვე გრძელდებოდა.