2020 წელი ყოველდღიურად გვთავაზობს არასასურველ სიახლეებს. პანდემიის შემდეგ, დედამიწა მიზანში ასტეროიდმა ამოიღო, რომელიც ჩვენი პლანეტის სიახლოვეს ამერიკის საპრეზიდენტო არჩევნების წინა დღეს, 2 ნოემბერს გამოჩნდება.

აშშ-ს აერონავტიკისა და კოსმოსის კვლევის ეროვნული სააგენტოს (NASA) რეაქტიული ძრავების ლაბორატორიაში (JPL) აცხადებენ, რომ კოსმოსური ობიექტი, სახელად 2018VP1, დედამიწას 2 ნოემბერს მიუახლოვდება.

"ასტეროიდი 2018VP1 ძალიან პატარაა და დედამიწისთვის საფრთხეს არ წარმოადგენს. თუ ის ჩვენს ატმოსფეროში შემოაღწევს, უმცირეს ნაწილაკებად დაიშლება", — აცხადებს ნასა.

იმის შანსი, რომ ასტეროიდი დედამიწას შეეჯახება, 0,41%-ია. ის პირველად 2018 წელს, კალიფორნიის ობსერვატორიაში შეისწავლეს და სწორედ ამიტომ ფიგურირებს ეს პერიოდი მის სახელში.

ერთი კვირის წინ, ინდოეთის ოკეანეს 3 000-მდე კილომეტრის მანძილზე ჩაუქროლა ასტეროიდმა, რაც, ნასას განცხადებით, არსებული ჩანაწერების ფარგლებში ყველაზე ახლო მანძილია.