შატილის გზაზე მომხდარი ავტოსაგზაო შემთხვევის შედეგად დაშავებული სამი მგზავრის მდგომარეობა მძიმეა. თსუ-ს პირველი საუნივერსიტეტო კლინიკის დირექტორის, ლევან რატიანის განცხადებით, პერსპექტივაზე ლაპარაკი ამ ეტაპზე ზედმეტია, ვინაიდან სამივე მათგანის ტრავმებმა სიცოცხლესთან შეუთავსებელი მდგომარეობა გამოიწვია.

"აღინიშნა უარყოფითი დინამიკა. განვითარდა შინაგანი სისხლდენა და პაციენტები სასწრაფო წესით შეიყვანეს საოპერაციო ბლოკში და უტარდებათ ოპერაცია. მესამე პაციენტის მდგომარეობა, ამ ეტაპზე, შედარებით სტაბილურია. ყველა სასიცოცხლო მაჩვენებელი ამ ეტაპამდე ნარჩუნდება მედიკამენტური გზით", — განაცხადა ლევან რატიანმა.

ავტოსაგზაო შემთხვევა დუშეთის მუნიციპალიტეტში, სოფელ ბისოს სიახლოვეს, შატილის გზაზე მოხდა. სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. გარდაიცვალა 17 ადამიანი, 3 კი მძიმედ დაშავდა. შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.